ATILA

Ti Masaok Kadagiti Naisalip iti ATILA 04-05

2005-05-03T13:51:00.000+08:00

(Tuloyna)

KADAGITI SIMMARUNO A TAWTAWEN, pinabileg ti anus ken sirmata dagiti mannurattayo ti ammoda babaen ti aktibidades ti GUMIL wenno ti tinawen a maang-angay a komperensia/kombension ti GUMIL Filipinas a dar-ayan ti amin a sangana manipud kadagiti internasional a tsapter kas koma ti GUMIL Hawaii wenno GUMIL Oahu, GUMIL Maui ken GUMIL California ken GUMIL Greece, ken manipud kadagiti probinsia wenno munisipalidad/eskuelaan, kdpy iti kada malpas ti Semana Santa ti pagilian wenno tunggal arinunos ti bulan ti Abril iti kada tawen. (Ita a tawen, inton Abril 22-24, 2005, a maangay ti kombension/komperensia idiay Suso Beach, Sta. Maria, Ilocos Sur, a kukua ken imatonan ni Apo Doktor Godofredo Reyes, maysa a nakoronaan a poet-laureate ti pagsasaotayo nga Iluko, ken maysa a patneng nga Ilokano ken ni kaingungotna a Doktora Dedicacion Agatep-Reyes. Masarakan ti BALAY TI GUMIL iti asideg-nga-abaga wenno las-ud iti Suso Beach nga indonar dagiti manangipateg nga agkaingungot a doktor-iti-medisina ti solar a nagbatayanna.)

Kalpasan daydi linteg-militar iti pagilian, adu dagiti mannurattayo ti nangpadas iti tekniko dagiti lumaud a literatura agpatingga kadagitoy a gundaway. Ket ti nagbalin nga epektona iti literaturatayo daytoy a panangpadas ket makuna a dakkel wenno napintas ta napagtalinaedtayo ti kultura ken ti tradisiontayo nga Ilokano. Ngem ditayo koma liplipatan a ditay inakas wenno dinadael dagiti kadaanan nga estilo ti panagsurattayo ngem ketdi iniluttayo tapno iti kasta ket no maidilig, saan a maudi ti pagsasaotayo kadagiti dadduma a pagsasao wenno literatura. Ti ammok, ti orihinal a panggep dagitoy a mannurat ket ti panangimportada kadagiti tekniko a Lumaud idinto nga ipreserba/ikamaligda met ti Iluko spirit wenno ti pagsasao, kultura ken ti tradisiontayo nga Ilokano. Iti 1980s, kaaduanna dagiti sinurat a maipanggep iti napasamak a domestiko a kas koma iti EDSA Rebolusion nga agpatingga kadagitoy a kanito, nupay di madakdakamat kadagiti sinurat, nalawag a makita wenno masirmata ti kidagna nga adda wenno nailinged wenno nangrugi idi dagita a parparikut kadagita a panawen.

Nangrugi ti pannakaipatarus ti Literatura Aleman iti Iluko idi kanikamano a tawen ti napalabas babaen ken ni Apo Juan S.P. Hidalgo Jr., a mabigbig nga ama ti GUMIL. Ni Apo Hidalgo ti agdama ita nga editor ti RIMAT, ti internasional a magasin ni Samtoy.

Kas madmadlawtayo, ti gapuanan dagiti Lumaud a mannurat ket in-inutda a dumakdakkel bayat panaglabas dagiti aldaw. Ken adu pay dagiti gapuananda maipanggep iti politika iti lugar dagita a mannurat ket naikkan wenno nayaplikaran kadagiti mayannatup nga atension. Ngem adu met dagiti mannurattayo a Samtoy a nangdakamat wenno mangdakdakamat kadagiti kasla iti naagapad iti ngato ket karaman ditan dagiti mannurat a nakisalip iti maikadua tawen ti ATILA, a kas koma kadagiti mannurat a naglinged iti parbo a nagan a Salvador T. Arte, Illo Minado ken Demilap it Orbil (to name a few).

(Adda tuloyna)

atila 04-05 salip ti puturistiko a sarita: resulta

2005-04-19T18:02:00.000+08:00

Adtoy metten, appo, ti matagtagiuray unay a resulta ti Salip ti Puturistiko a Sarita ti ATILA 2004-2005, kas impakaammo ti Secretariat ti salip:

Umuna a Gunggona: "Decreto Numero Trece" ni Joel B. Manuel ti Ilocos Norte

Maika-2 a Gunggona: "Dung-aw ti Pannakaungaw" ni Herman G. Tabin ti Metro Manila/Ilocos Sur

Maika-3 a Gunggona: "Baro a Lawag" ni Danilo Antalan ti Ilocos Sur

Maika-4 a Gunggona: "Ni Lakay Asseng, ti GUMIL, ken ti Sangaili" ni Arnold P. Jose ti Metro Manila/Ilocos Norte

Maika-5 a Gunggona: "Palimed ti Paraiso: iti Bangir a Rupa ti Sierra Madre" ni Mindo N. Aquino ti Isabela

Dagiti naghurado: Aurelio S. Agcaoili, chairman; Linda Lingbaoan-Bulong, ken Roy V. Aragon, kamkameng.

atila 04-05 salip ti daniw: resulta

2005-04-16T08:30:00.000+08:00

Adtoyen, appo, ti matagtagiuray unay a resulta ti Salip ti Daniw ti ATILA 2004-2005, kas impakaammo ti Secretariat ti salip:

Umuna a Gunggona: "Sagbibinting a Daniw ken Dadduma Pay" ni Ariel S. Tabag ti Cagayan

Maika-2 a Gunggona: "Basabas a Balikas ken Dadduma Pay a Dugayong iti Nadaguyemyem a Nakem" ni Reynaldo A. Duque ti Metro Manila/Ilocos Sur

Maika-3 a Gunggona: "Exodo-Samtoy: Glosalia-Meditasion" ni Fernando B. Sanchez ti Pangasinan

Maika-4 a Gunggona: "Ingel ti Bennal ken Dadduma pay a Daniw" ni Benjamin Pacris ti Ilocos Sur

Maika-5 a Gunggona: "Rikna-Sirmata-Padas: Burburtia Ti Talugading" ni Mindo N. Aquino ti Isabela

Dagiti naghurado: Jose A. Bragado, chairman; Joel B. Manuel, ken Roy V. Aragon, kamkameng.

Maisarunonto a maipakaammo ti resulta ti Salip iti Puturistiko a Sarita.

Ti Masaok kadagiti Naisalip iti ATILA 2004-2005

2005-04-02T12:19:00.000+08:00

ni ART TOLENTINO IGNACIO

KUNADA A TI KINAKONTEMPORARIO ti Literatura Ilokana, iti laksid ti kinabayagnan, ket maibilang pay laeng a kas baro a literatura. Ken inayonda nga adayo pay laeng a magaw-atna ti nasiksiken a tarigagay ken 'tay kunada a formative age. Dagiti rebolusion a napaspasamak iti pagiliantayo a Filipinas kanikamanon a tawtawen ti naglabas, ket kasla dagitoy ti nangibiat manen iti rugso ti Literatura Ilokana. A kasla koma iti maar-aramid iti politika, edukasion ken adu pay a pagpagteng a nasken tapno agbiagtayo a sitatalna. Tapno makunatayo a ti Literatura Ilokana ket nakaadayon, masapul a taliawentayo ngarud ti napalabas. Ti Literatura Ilokana, ket agtultuloy a tumartaray wenno agluplupos nga agturong iti pedestal ti panaikatan-ok manipud idi a panawen a pannakayam-ammo daytoy a literatura wenno pagsurat iti pagsasao a Saluyot, agingga kadagitoy a gundaway.

Adun ti mannurattayo a mangurkurimay iti kunada a modern fiction: klasikal wenno stylistic wenno kadaanan/tradisional nga estilo ti panagsuratan. Ket uray kadagiti naisalip iti ATILA ita a tawen, iti panagkunak, ti napasamak a rebolusion iti pagiliantayo a Filipinas ket napigsada a nangiduron kadagiti mamannurattayo a nangitugot iti pagsasaotayo kadagiti ordinario a pagsasao a kas koma iti Iluko kompara iti ganggannaet a pagsasao. A nupay adu a mannurat ti naimpluensaan kadagiti ganggannaet (lumaud) a tekniko ti literatura, nagtalinaed met nga ikuttayo ti kinabaknang ni Ilokano a tradision ken kultura a kas naiparangarang kadagiti adu a sinurat dagiti agdama ken nalalatak a mannurattayo.

Daytoy a masaok ket saan koma nga agbalin a kas historia ti pasasaotayo a mangipaduyakyak wenno mangipaneknek a nagbalin a moderno ti Literatura Ilokana ngem iti panagkunak, inton madanonan, nalabit a saanto masayang ti imatang wenno panawentayo a mangbasa/mangsukisok kadagiti nangabak iti pasaliptayo ita a tawen ta kastay nakunakon, namsekda iti sirmata, tarigagay ken namnama ken pannakigasanggasat a kas pudno nga Ilokano!

Ammok a delikado no idiligtayo dagiti sinurat a kas historical ta amangan no inton basaenyo ket ramenanyo iti kunada iti ingles a “social background,” ken”‘literary influences” ket ulawennatayo dagita nga istoria ta saanton nga independiente ti konsentrasiontayo a napasamak dagiti istoria iti dayta nga aldaw wenno gundaway, idi laeng kalman, idi lawasna, wenno iti masungad a pampanawen gayam… Ken ti panangibilang kadagiti autor saan a kas indibidual nga addaan kadagiti naidumduma a kapanunotan iti biag ken ug-ugali ngem ketdi, ti koma lagipentayo ket ordinarioda laeng a parsua a kas kadatayo ken simpleda laeng a kameng iti kunkuna ken madamdamagtayo a GUMIL wenno GUnglo dagiti Mannurat nga ILokano, a ti ina ket ti GUMIL FILIPINAS.

(Adda tuloyna)

official entries: kompleto a paulo agraman parbo a nagan ti autor

2005-03-30T08:22:00.000+08:00

Adtoyen ti kompleto a paulo dagiti kualipikado nga entries, agraman parbo a nagan dagiti autor.

Dagiti daniw:

"Sagbibinting a Daniw ken Dadduma Pay" ni Anib Miguel

"Dagiti Napili a Daniw ken dadduma pay a Dandaniw" ni Saniata A. Nasudi

"Basabas a Balikas ken Dadduma Pay a Dugayong iti Nadaguyemyem a Nakem" ni Apo Dugong

"Ingel ti Bennal" ni Diwdiw-as Tinglayan

"Exodo-Samtoy: Glosalia-Meditasion" ni Angela De Dios

"Sangareppet a Daniw-Kaunggan" ni Daklis

"Dagiti Mapukpukaw a Kannawidan" ni Rosa Mina

"Rikna-Sirmata-Padas: Burburtia Ti Talugading" ni Mayengmeng Ti Aglawlaw

"Masukit ti Paragpag Tunggal Panagaripapa a Mauyos iti Misuotna ken Kasano Ngamin no Isukatnaka Latta: Ket, ay, Kas Kasudi ti Isem Ti Salesgirl nga Umasidegen Kenka, Naimayengka iti Milagro Ti Alino---Mannaniw, Sinanakem Dagiti Saksakiten Wenno Sika Ti Addaan Saksakit-Nakem? (Philippine General Hospital, Enero 13-18, 1997)" ni Juan A. Pascual Jose

"Sangadosena a Dandaniw" ni Teddyboy Itchon

"Iti Akinruar a Kaunggan" ni Ali Muken

"Dandaniw ti Puso" ni Princess Urduja

"Nailibay a Siudad ken Dadduma pay a Daniw" ni Gasat

Dagiti sarita:

"Ti Dallang, ti Pakkong ken ti Tallak" ni Sagada del Pilar

"Abraham Ventura, 61, Balikbayan: Laoag Circa 2050" ni Mammadto T. Amianan

"Ti Babak ni Jamal" ni Julian Madarang

"Ti Tropeo ni Tata Salvador" ni Precious Suzette

"Sab-ong" ni Islang K. Ayumanggi

"Grasia Idi, Ita ken iti Agnanayon" ni E.D. Konserbasion

"Dagiti Tirtiris a Papel iti Tawen 2105" ni Dolly Maspalos

"Ama Abraham Parsua, Iti Maika-90 a Panangkasangayna iti Tawen 2054" ni Frank Wasder

"Bro. Orly: Mangaskasaba" ni Zharish Lei Genesis

"Ni Lakay Asseng, ti GUMIL, ken ti Sangaili" ni Sadiri Kuyuyot Salamangka

"Palimed ti Paraiso: iti Bangir a Rupa ti Sierra Madre" ni demilaP it orbiL

"Kulintaba" ni Illo Minado

"Decreto Numero Trece" ni Salvador T. Arte

"Dung-aw ti Pannakaungaw" ni P. N. Ngukom

"Linteg 14344" ni Baihuacun

"Kalpasan iti Panagkatangkatang" ni Migrante Palayupoy

"Felomino" ni Sapulek T. Laoag

"Baro a Lawag" ni thebiblecode.com

"Apocalipsis" ni Ma. Ukomen T. Lubong

"Rang-ay iti Insangbay iti Teknolohia L666" ni Pastor Bullalayaw

official entries, salip iti daniw

2005-03-21T12:59:00.000+08:00

Adtoy ti listaan dagiti kualipikado nga entries para iti Salip ti Daniw ti ATILA 04-05, kas impakaammo ti contest secretariat:

"11-a-Daniw-Babilonia: iti Tartaraudi dagiti Aldaw"
"Sagbibinting a Daniw, ken dadduma pay"
"Dagiti Napili a Daniw ken dadduma pay a Daniw"
"Basabas a Balikas"
"Ingel ti Bennal"
"Exodo-Samtoy: Glosalia-Meditasion"
"Sangareppet a Daniw-Kaunggan"
"Dagiti Mapukpukaw a Kannawidan"
"Rikna-Sirmata-Padas: Burburtia Ti Talugading"
"Masukit ti Paragpag Tunggal Panagaripapa..."
"Sangadosena a Dandaniw"
"Iti Akinruar a Kaunggan"
"Dandaniw ti Puso"
"Nailibay a Siudad"

official entries, salip iti puturistiko a sarita

2005-03-21T12:40:00.000+08:00

Kas impakaammo ti secretariat ti ATILA 04-05, adtoy ti listaan dagiti kualipikado nga entries iti Salip iti Puturistiko a Sarita.

"Ti Dallang, ti Pakkong ken ti Tallak"
"Abraham Ventura, 61, Balikbayan"
"Ti Babak ni Jamal"
"Ti Tropeo ni Tata Salvador"
"Ti Sab-ong"
"Grasia Idi, Ita ken iti Agnanayon"
"Dagiti Tirtiris a Papel iti Tawen 2105"
"Ama Abraham Parsua, Iti Maika-90 a Panangkasangayna iti Tawen 2054"
"Bro. Orly: Mangaskasaba"
"Ni Lakay Asseng, ti GUMIL, ken ti Sangaili"
"Palimed ti Paraiso: iti Bangir a Rupa ti Sierra Madre"
"Kulintaba"
"Decreto Numero Trece"
"Dung-aw ti Pannakaungaw"
"Linteg 14344"
"Kalpasan iti Panagkatangkatang"
"Felomino"
"Baro a Lawag"
"Apocalipsis"
"Rang-ay iti Insangbay iti Teknolohia L666"

Nayawaten kadagiti napusgan a hurado dagiti entry. Kinuna ni Sgt. First Class Art T. Ignacio ti U.S. Army, esponsor ti salip, a maipakaammonto no kaano ken sadino ti pakapadayawan dagiti mangabak.

Nota: Maipostento met laeng manen ditoy ti opisial a listaan ti entries a karaman dagiti parbo a nagan dagiti autor.

opisial a pakaammo.

2005-02-14T12:16:00.000+08:00

Kayatmi nga ipatalged a matuloy, appo, ti ATILA 2005. Wen, matuloy ken agtuloy. Ania man a sarsarita wenno saosao a madamdamag wenno mabasbasayo a mangipakpakdaar wenno mangidandanon a saan a matuloy ti salip ita a tawen, saan, appo, nga opisial daytoy a naggapu iti ATILA, nangruna iti sponsor/founder.

Ti OPISIAL A WARAGAWAG: MATULOY ti ATILA 2005 kas pinasingkedanen ti main sponsor/founder.

Naitantan laeng ti pannakaukkon dagiti entry gapu kadagiti banag a di naliklikan a napagteng. Ngem amin a naawat nga entry, saanyo koma a pakadanagan, appo a nakisalip, ta adda dagitoy iti nasayaat nga im-ima. Ti dadduma ket nayawat payen iti hepe dagiti aghurado. Maipaskilto ditoy ti opisial a listaan ti amin a naawat nga entry.

Adda iti baba ti partial a listaan (paulo ti sarita ken ti parbo a nagan ti autor) ti naawat nga entries iti salip ti puturistiko a sarita:

Apocalipsis ni Ma. Ukomen T. Lubong
Baro a Lawag ni thebiblecode.com
Bro. Orly: Mangaskasaba ni Zharish Lei Genesis
Felomino ni Sapulek T. Laoag
Kalpasan iti Panagkatangkatang ni Migrante Palayupoy
Linteg 14344 ni Baihuacun
Rang-ay iti Insangbay iti Teknolohia L666 ni Pastor Bullalayaw

Padaanan ti dadduma pay a lista ti entries.

Happy Valentine's Day iti amin nga agay-ayat, maay-ayat, makiin-innayat, managayat!

maysa a pakaammo

2005-02-10T18:49:00.000+08:00

Daytoy ket manipud a mismo iti biangko, iti limitado a kapasidadko kas maysa a nagboluntario a tumulong iti pannakaisayangkat ti pasalip ti ATILA 2004 ken iti ATILA 2005. Limitado kunak man a saan a panangilisi iti bagbagik ngem gapu ta agpayso a kadakami a kadua wenno nakadua ni Apo Art iti naglabas a salip (ATILA 2004) ken iti salip ita a tawen (ATILA 2005), saanmi a naan-anay a maibagian ti sponsor wenno dagiti sponsor ti salip, kangrunaan ti founder. Awankami, awanak ngarud iti naan-anay a posision ita tapno isaw-ak ni Atanud ATI wenno ti ATILA in general. Daytoy a posision wenno takder ket karbengan laeng ti sponsor/s wenno founder wenno no siasino man a pusganna a mangilawlawag wenno mangipakaammo iti status ti ATILA 2005.

Kakabsat, dumawatak iti pannakaawatyo, iti dispensa, gapu kadagitoy a mapaspasamak. Kaniak, ken ni Atanud Daniel, ken pati ken Mang Jimmy, ladingitenmi daytoy a kasla pannakaitantantan ti napateg a pannakaiwaragawag ti agdama a kasasaad ti salip ita a tawen. Nangruna ti banag a matuloy ken agtultuloy kadi pay ti salip wenno saanen. Adda laeng dagiti di napakpakadaan a bambanag a nakatubeng.

Kas iti naibaga ni Apo DLN iti dap-ayan ti ILUKO.COM, padapadakami nga agpannuray iti main sponsor/founder, ni Apo ATI, no anian ti sumaruno nga addang ti salip. Adda kenkuana amin a sungbat. Nga isu met ti tagiuraymi, tagiurayko. Ta uray dakami, kas iti kaaduan, padpadaananmi met ti napateg a pakaammo ti sponsor.

Apaman a mapakaammuannak ti sponsor/founder, ipostek a dagus ditoy ken uray iti ILUKO.COM ti opisial a pakaammo.

Iti biang ni Apo Jimmy Agpalo, saantay' koman unay a dariragen isuna maipapan iti ATILA 2005. Awan unay ti mabalin a mailawlawag ni Mang Jim itoy. Pudno a dakami amin ti kasla agparparang a nangituyang wenno manarawidwid iti ATILA ngem gapu laeng dayta iti nasged a tarigagay ken ayatmi, idi ken ita, iti itatalingenngen ken isasantak pay koma ti Literatura Iloko. Kas managayat, manangipateg iti literatura/kultura Iloko, ania ken apay ketdi koman a dikam' siaayat ken siraragsak met a makitinnulong no adda dagiti kakadua ken/wenno indibidual a mangdawat iti saranay ken simpatia iti pannakairusat ti kas iti ATILA wenno dadduma pay a sayangkat a nairanta a para iti pagsayaatan ti literatura a Samtoy ken dagiti mannurat a Saluyot? Saanmi a di napagwenan a dagus dayta ket isu a nairamramankami iti ATILA.

Itan, sangkabassit la koma pay a pannakaawat, kakabsat, urayentayo koma a padapada no ania ti pinal a sao wenno pangngeddeng a mismo ti sponsor/founder.

Agyamanak unay.

Siraraem iti amin,

Roy V. Aragon

Nota: No adda, kakabsat, mensaheyo kaniak a personal, iturongyo latta koman iti emailko, iti rvaragon@gmail.com wenno iti rvaragon@hotmail.com.

palagip, palagip kadagiti mannalip

2004-10-13T11:17:00.000+08:00

Ipalagipmi kadagiti mannurat nga Ilokano nga ipatulodyon dagitay entryyo iti agdama a pasalip ti ATILA iti 2004-2005. Dayta, a, no nalpasyon ken kapkapnekanyon a pakilaban a talaga ken lumaban ken mangatiw! Mabalinyo pay ketdi met a linayen latta, kayasan latta a kayasan, ta adda pay met pawayway a sumagmamano a bulan sakbay ti dedlayn ti dua a salip ti ATILA 2004-2005.

Ulitenmi ngarud man nga ipaskil ditoy ti pagganurotan dagiti dua a salip.

SALIP #1:

Art Tolentino Ignacio Literary Awards 2004-2005
Salip iti Puturistiko a Sarita

Dagiti Pagannurotan:

Silulukat ti pasalip iti amin a mannurat nga Ilokano, agdadamo ken saan, iti man Filipinas wenno iti uray ania a pagilian.

Nangrugi ti pasalip iti Enero 1, 2004 ken aggibus iti Enero 31, 2005.

Ti sarita a suraten ket puturistiko, agwerret kadagiti tao, lugar ken pasamak iti masakbayan, iti sumaruno a 25 wenno 50 wenno 100 a tawen manipud iti agdama. Nasken a maipapan kadagiti Ilokano, mailugar ken mapasamak iti Filipinas kangrunaan iti Kailokuan, ti putaren a sarita. Saan a nasken a maipapan iti siensia wenno teknolohia ti tema wenno pakabuklan ti sarita, ketdi, maipangruna a matratar ti kultural, sosial, politikal-ideolohikal, ekonomikal wenno uray nainrelihionan a kasasaad ni Ilokano wenno ti Kailokuan iti masakbayan. Nupay kasta, no saan a maliklikan a mataked ti siensia wenno teknolohia mainaig kadagiti naagapad a kasasaad, saan koma nga agtinnag a bin-ig a science fiction ti sarita.

Saan a makedngan ti kaababa wenno kaatiddog ti isalip a sarita, nawaya ti autor a mangeddeng no mano a panid ti manuskrito nga isumitena. Nasken met a naimakinilia ti isalip a sarita iti doble espasio iti 8-1/2” x11” a bond paper. Nasaysayaat pay no naikompiuter ti isalip iti font size a 12 ken fontface a Times New Roman wenno Arial. No naikompiuter ti isalip, pakuyogan ti kopiana iti diskette a naglaon iti file ti entry (iti MS Word document (.doc wenno .rtf) a format). Uppat a kopia ti manuskrito ti sarita ti mangbukel iti entry. Parbo a nagan ti usaren ti autor kas byline iti entryna. Pakuyogan ti entry iti nakarikep a sobre a naglaon iti paulo ti sarita, parbo ken pudno a nagan, kompleto/umno nga adres ti agdama a pagtaengan wenno pagobraan, email address ken cellphone/telephone number (no adda), maysa a 2”x2” a kaudian a ladawan, ken ababa a pakasaritaan ti biag.

Maysa laeng a sarita nga orihinal, bukod a putar, saan a patarus manipud aniaman a pagsasao, di pay naipablaak iti aniaman a publikasion a printed (libro, magasin, pagiwarnak, kdpy) wenno digital (e-book, internet, kdpy) ken di pay nangabak iti aniaman a salip, ti mabalin nga isalip ti tunggal autor.

Agbalin a kukua ti esponsor dagiti mangabak a sarita ken addaan karbengan a mangedit ken mangipablaak kadagitoy iti libro, magasin, pagiwarnak, internet, iti man printed wenno digital a format, nga awan sungsungbatanna iti autor. Agtalinaed ketdi ti copyright iti autor.

Pinal ti pangngeddeng dagiti hurado, saan a maibabawin ti naikeddeng a nangabak, malaksid no matakuatanto a sinalungasing ti nangabak nga autor ti Pagannurotan Bilang 5. No naglabsing ti autor, maibabawi ti premio ket maparitanto metten a makisalip pay kadagiti sumarsaruno pay a pasalip ti ATILA.

Paset ti pasalip ti panangsuratto dagiti agpaay a hurado iti bukodda a critical analysis wenno paliiw kadagiti amin a naisalip a sarita, nangabak man wenno naabak. Maisingasingto a maipablaak met dagitoy a paliiw wenno makuna ti/dagiti hurado iti magasin wenno libro a pakaipablaakan dagiti mangabak a sarita.

Dagiti premio: Umuna a Gunggona: $550.00; Maikadua a Gunggona: $450.00; Maikatlo a Gunggona: $350.00; Maikapat a Gunggona: $250; ken Maikalima a Gunggona: $200.00. Maipaayan pay iti Plake ti Pammigbig dagiti mangabak.

Mapadayawan dagiti mangabak kabayatan ti National Convention ti GUMIL Filipinas iti Kalgaw 2005. Dagiti mangabak a saan a makapan iti GF Convention, maibusonto wenno mapanto idanon ti esponsor ti premioda.

Ipatulod dagiti entry itoy nga adres: ATILA 2004-2005, c/o Daniel Nesperos, Liwayway Publishing, Inc., 2249 Chino Roces Avenue, 1231 Makati City. Kadagiti adda accessna iti Internet, nasaysayaat no i-email ti entry iti kampilan001@yahoo.com wenno artesobra@yahoo.com wenno AIGNACIO@hot.rr.com (i-attach iti email ti file ti entry agraman nakasina a file ti ababa a pakasaritaan ti biag; pakuyogan met iti scanned a ladawan (no adda), i-attach met laeng daytoy iti email). Nasken a maipatulod amin nga entries iti di naladladaw ngem Enero 31, 2005 (nasken a natimbrean ti sobre wenno pakete wenno email iti petsa sakbay wenno iti Enero 31, 2005).

SALIP #2:

Art Tolentino Ignacio Literary Awards 2004-2005
Salip iti Daniw

Dagiti Pagannurotan:

Silulukat ti salip iti amin a mannaniw nga Ilokano iti Filipinas ken iti uray ania a pagilian. Mangrugi ti salip iti Marso 1, 2004 ken aggibus iti Enero 31, 2005.

Koleksion ti daniw, a buklen ti 12 wenno nasursurok pay, ngem saan a sumobra iti 15 a dandaniw, ti suraten kas entry. Silulukat ti tema ti putaren a daniw ngem maipangruna dagiti mangiladawan iti kultura ni Ilokano. Nawaya ti mannaniw iti estilo a kayatna a panangputar wenno panangsukog iti dandaniwna.

Nasken a naimakinilia ti isalip a dandaniw iti doble espasio iti 8-1/2” x11” a bond paper. Nasaysayaat pay no naikompiuter ti isalip iti font size a 12 ken font face a Times, Times New Roman, Helvetica wenno Arial. Uppat a kopia ti manuskrito ti koleksion ti dandaniw ti mangbukel iti entry. Parbo a nagan ti usaren ti mannaniw kas byline iti entryna. No maikompiuter ti maisalip a manuskrito, mapakuyogan koma ti hard copy iti diskette a naglaon iti dua a MS Word document (.doc wenno .rtf) a kopia ti entry. No ikoreo ti manuskrito a maisalip, pakuyogan ti entry iti nakarikep a sobre a naglaon iti paulo ti koleksion ti daniw, parbo ken pudno a nagan, kompleto/umno nga adres ti agdama a pagtaengan wenno pagobraan, email address ken cellphone/telephone number (no adda), maysa a 2”x2” a kaudian a ladawan, ken ababa a pakasaritaan ti biag. No i-email ti entry, pakuyogan daytoy iti dua a MS Word document (.doc wenno .rtf) a naglaon iti paulo ti koleksion ti daniw, parbo ken pudno a nagan ti mannaniw, ken ababa a pakasaritaan ti biagna; pakuyogan met iti scanned a ladawan (no adda), i-attach met laeng daytoy iti email.

Maysa laeng a koleksion ti daniw nga orihinal, bukod a putar, saan a patarus manipud iti aniaman a pagsasao, di pay naipablaak iti aniaman a publikasion a printed (libro, magasin, pagiwarnak, kdpy) wenno digital (e-book, CD-ROM, DVD-ROM, internet, kdpy) ken di pay nangabak iti aniaman a salip, ti mabalin nga isalip ti tunggal mannaniw.

Agbalin a kukua ti esponsor dagiti mangabak a daniw ken addaan karbengan a mangedit ken mangipablaak kadagitoy iti libro, magasin, pagiwarnak, internet, iti man printed wenno digital a format, nga awan sungsungbatanna iti mannaniw. Nupay kasta, agtalinaed ketdi ti copyright iti mannaniw.

Pinal ti pangngeddeng dagiti hurado, saan a maibabawi ti naikeddeng a nangabak, malaksid no matakuatanto a sinalungasing ti nangabak a mannaniw ti Pagannurotan Bilang 4. No naglabsing ti mannaniw, maibabawi ti premiona ken mapawilanton a makisalip pay kadagiti sumarsaruno pay a pasalip ti ATILA.

Paset ti salip ti panangsuratto dagiti agpaay a hurado iti bukodda a critical analysis wenno paliiw kadagiti amin a naisalip a daniw. Maisingasingto a maipablaak met dagitoy a paliiw wenno makuna ti/dagiti hurado iti magasin wenno libro ken dadduma pay a medium a pakaipablaakan dagiti mangabak a daniw.

Dagiti gunggona: Umuna a Gunggona: $350.00. Maikadua a Gunggona: $300.00. Maikatlo a Gunggona: $250.00. Maikapat a Gunggona: $200.00 ken Maikalima a Gunggona: $150.00 Maipaayan pay iti Plake ti Pammigbig dagiti mangabak.

Mapadayawanto dagiti mangabak kabayatan ti National Convention ti GUMIL Filipinas iti Kalgaw 2005. Dagiti mangabak a saan a makapan iti GF Convention, maibusonto wenno mapanto idanon ti esponsor ti premioda.

Ipatulod dagiti entry itoy nga adres: Salip ti Daniw, ATILA 2004-2005, c/o Daniel Nesperos, Liwayway Publishing, Inc., 2249 Chino Roces Avenue, 1231 Makati City, Philippines. Kadagiti adda accessna iti Internet, i-email ti entry iti kampilan001@yahoo.com wenno artesobra@yahoo.com wenno AIGNACIO@hot.rr.com. Nasken a maipatulod amin nga entries iti di naladladaw ngem Enero 31, 2005.

No adda saludsodyo, apo, wenno kayatyo a malawlawagan kadagitoy a pagannurotan wenno maipapan iti salip, dikay' koma bumdeng a mangkontak kadakami babaen ti email. Wenno babaen ti comment system iti baba.

palanca pics circa 2003

2004-10-09T17:44:00.000+08:00

Gapu iti nagadu a request kada special request, adtoy man ngaruden ti ladladawan iti napalabas a Palanca Awarding idi 2003. (Iklik dagiti ladawan para iti dakdakkel a buya.)

Dagiti malalaki a winners iti Iluko a sarita: Clarito Garcia Francia (3rd place), Reynaldo A. Duque (1st place, 1st place pay iti Filipino a sarita, ken Hall of Fame Awardee [nakaliman a 1st prizes, saan, nakainnem pay ketdin]), ken Ariel S. Tabag (2nd place).

Dagiti winners ken dagiti pakner ken badigardda, este, guestda, agpakanawan: Juan S.P. Hidalgo, Jr. (hurado iti sarita a Filipino), AST, CGF, Miss Cagayan Tourism 2003 Leofina Jane Galleta, Rimat Publisher Angel R. Calso, RAD, Arnold Pascual Jose, Tessie Duque, Amor Hidalgo, ken Namnama Hidalgo.

palanca pics circa 2001

2004-09-08T13:28:00.000+08:00

Kalkalpas ti Palanca awarding itay Setiembre 1 iti Manila Peninsula Hotel iti Makati, a nangawatan ni DLN iti premiona nga aganay sa a siam a riwriw a pisos no dikami agerrado, kas nangabak iti Maikadua a Gunggona babaen ti saritana nga "Opas" a maipapan iti monopolia ti tabako iti Ilocos idi panawen dagiti Kastilaloy. Ngem ania ti opas, kunayo? Saludsodenyo, a, ken ni DLN! (Congratulations met kadagiti kadua ni DLN a nangabak, da Apo Prescillano Bermudez a nangigarong iti Umuna a Gunggona, ken ni Apo Severino Pablo a nangipasiking iti Maikatlo a Gunggona; kasta met ken ni Apo Clarito Garcia de Francia a nangikostal iti Maikadua a Gunggona iti sarita a Filipino!)

Pangur-urayan kadagiti ladawan da DLN, no palubosanda maipabuya ditoy ATILA, adtoy man a nagbukibokkami kadagiti filesmi ket nakasarakkami iti sumagmamano a retrato iti Palanca awarding idi Setiembre 1, 2001 (iklik dagiti ladawan para iti dakdakkel nga ala)...

Agpakanawan: Johnny Asuncion ti Bannawag, guest; Arnold Pascual Jose, 3rd prize winner; DLN, guest; ken Rudy Contillo ti Bannawag, guest

Agpakanawan, nakatugaw: Edilberto H. Angco (naka-sideview), hurado; daydi Apo William Alvarado, 2nd prize winner; Johnny Asuncion. Ni Juan SP. Hidalgo, Jr. ti Rimat ti nakatakder iti likud, a nagpaay a hurado

Ni RVA idi pimmatnga iti entablado tapno awatenna ti premiona kas 2nd prize winner iti sarita a Filipino

some pakalaglagipan/malaglagip pics

2004-08-13T10:42:00.000+08:00

Pagur-urayan latta iti isasangpet dagiti maisalip iti ATILA 2004-2005 Salip iti Sarita ken Salip iti Daniw, adtoy man nga ipabuyami ti nadumaduma a ladladawan dagiti mannurat...

Baguio City idi 1996, bayat ti UP National Writers Workshop a nakipartisiparan dagiti Ilokano a mannurat kas Fellows ken Panelists. Ala iti maysa nga asosenahan iti Baguio city market. Agpakanawan: Robert Fernandez, RVA, Erick F. Abad (taga-DLSU a Fellow iti sarita a Filipino), DLN, Reynaldo A. Duque (Panelist), ken Aida C. Tiama. Dagiti inorderda: kilawen nga aw-aw, kaldereta nga aw-aw, adobo nga aw-aw...

Ala iti plantasion ti gmelina ken mangga ni Pete Duldulao iti Bugnay, San Nicolas, I.N. Agpakanawan, nakatakder: Delfin Dumayas, Jovymar Tactac, DLN, RVA, Mary Jane D. Aragon, Giovanni Palomares, Emily Buhay, ken John Buhay. Nakatugaw, agpakanawan: Buniag Buhay, Maelany Binbinon, Judy Cajigal, ken Pete Duldulao.

some pics

2004-07-01T11:40:00.000+08:00

Ne, di met unay a talagan masangsangon san daytoy website? Pasensiaanyon, kakabsat... Agaktibonto manen, sigurado, daytoy a site apaman a makaawatkamin kadagiti entry kadagiti dua a salip iti ATILA 2004-2005...

Kabayatanna, adtoy man ti sumagmamano a ladawan:

(Ala daytoy iti pagtaengan da RVA, idi pimmasiar da ATI ken DLN iti Tuguegarao. Agpakanawan: RVA, DLN, Prof. Jimmy Domingo, Nelson Daligcon, ken ATI)

(Ni Imnas Cyberia Linglingay ken ni ninongna ATI)

nangabak a sarita iti atila 2003-2004

2004-06-14T11:38:00.000+08:00

Naibayag man ti dimi panag-blog. Awan man unay ti naipadpadamagmi ditoy nupay adu ti dagiti nasken a maipadamag. Pagdisdispensaranyo la koman, appo a gagayyem ken kakadua, ta adu met dagiti nakatubeng a bambanag tapno uray inaldaw koma nga adda baro wenno update ditoy.

Ti maysa a pakaseknanmi nga ikkan iti dakamat ditoy ket ti pannakipagladingit ti sibubukel nga ATILA iti ipupusay ni Apo Bagnos Cudiamat ti Baguio City. A kadagiti naud-udi nga al-aldawna, nangruna idi Marso, kalpasan ti kombension nasional ti GUMIL Filipinas, ket napagasatankami iti ATILA a nakadua ni Apo Bagnos iti sumagmamano nga oras idiay Siudad dagiti Saleng iti sidong da Apo Jimmy Agpalo ken Dr. Clarito De Francia. Ngem sabalinton a salaysay siguro dayta...

Ket ditoy, ipakaammomi man a mabalinyon a basaen iti web dagiti nangabak a sarita iti napalabas a salip ti ATILA 2003-2004. Isarunomi nga inayon ti kabibiag ken ladawan dagiti autor. Ken kasta met, kangrunaanna, ti paliiw dagiti hurado.

Naragsak a panagbasa!

palagip kadagiti mannalip

2004-04-14T11:38:00.000+08:00

Kadagiti agisagsagana iti dandaniw ken sarita nga isalipda iti ATILA 2004-2005, ipalagipmi ti panangimanyo koma a nalaing kadagiti pagannurotan ti salip tapno saanto a madisqualify dagiti entryyo. Iti napalabas a salip, dadduma nga entry ket nadiskualipay gapu laeng kadagiti uray babassit a teknikal a rason kas koma iti size ti font nga aramaten no maikompiuter ti manuskrito, ti espasio dagiti linia, ken kasta met ti naited a tema ken porma. Isu a basaenyo koma, appo a naayat a mannakisalip, a naimbag dagiti pagannurotan.

Iti kombension nasional ti GUMIL Filipinas inton Abril 16-18 idiay National Press Club, Manila, addanto maiwaras a kopia ti pagannurotan ti ATILA 2004-2005.

Ala, ngarud, papintasenyo a nalaing dagiti entryyo, linayenyo a nalaing uray ta naunday met ti naited a pawayway ti salip...

maudi a pannakipatang ken ni mgb

2004-03-27T13:20:00.000+08:00

Maysa a panglaglagip/pakalaglagipan a salaysay iti simmina a mannurat, Meliton Gal. Brillantes, ni Ariel S. Tabag, winner iti 1st ATILA ken editorial staff ti RIMAT Magasin.

Idi Dakulapek ti Idolok
ni Ariel S. Tabag

MAIKADUA a daras a sumarungkarak iti pagtaengan ti pagtamdak a mannurat, ni Apo Meliton Gal. Brillantes. Kas iti damo, diak natantia, iti agalas onse media iti bigat ti Domingo, Disiembre 28, 2003, no sadino ti nagkurusan dagiti kalsada a Loriga ken Gallarza iti Aparri, Cagayan. Iti dayta a gundaway, saan a panagsaraaw ti boksit ta nagpennekak iti tinubong, patupat ken macaroni salad a sagana iti napalabas a Paskua wenno ti awan sarday a panagestoria ti kaduak, ni kamannurat Leofina Jane G. Galleta. Natikaw ti tricycle driver iti direksion nga insuro ni Apo Henry Trinidad ti Masi, Sta. Teresita, Cagayan ken Bise Presidente ti GUMIL Cagayan ngem diakon ilanad no ania wenno kasano.

Nupay kasta, ti kinalatak ni Apo Brillantes ti nangitunda kadakami iti pagtaenganda. Kas iti damo a panangdakulap ti agraem iti pagraemanna unay a mannurat, nairut ti panangpetpetko iti dakulap ni Apo Brillantes wenno Mang Mel bayat ti panangkablaawko iti manayon a gasatna iti panawen ti Paskua ken isasangbay ti 2004. Dagus a nadlawko a kasla timmulang ti kanawan a dakulapna.

“Nagpuypuyatkayo kad’ met a naki-Misa de Gallo?” impasaksakko.

Nagrungiit ti idolok. “Nagsakitak.” Naguyek iti nalag-an. “Dumanonkayo, a.”

Iti ilalaemmi, intuloyna: “Idi insardengkot’ agsigarilio, nagsakitak metten a kasla diakon makaanges.”

“Ngem di met narignas ‘ta kinaguapoyo.” Immisemak ta narimat latta dagiti matana.

Impalawlawko ti imatangko iti bassit ngem naurnos a salas. “Awan dagiti kabbalayko. ‘Panda nakigimong.”

Minuraregak dagiti nayaruy-oy a pammadayaw iti diding: GRAAFIL, Bannawag, GETSMAIL, ETTI, kdpy.

“Uray kasta lat’ matawidko kadakayo.” Intudok ti medalia ken sertipiko ti Pedro Bucaneg Award a napetsaan iti Abril 2001. “Mabalin kan’ nga ipaaramid a singsing ket. ‘Pia la nga isukat iti alingo.” Kinunak nga agkatkatawa.

“Alistuanyo, a,” kinitanakami ken ni Fina (birngas ni Blsng. Galleta), “ita ta kaub-ubinganyo. Ken addakam’ a mangibagnos kadakayo.” Nagsadag iti sopa a tugaw sa pinerrengna ti kisame. “Idi dakam’ ken Disiong (awagna ken ni Apo Bulong), umanayen dagiti panid ti Bannawag a nangrugianmi.”

“Talaga a kinareeryo (career), aya?”

“Nakaay-ayat, a, ta tunggal adda sumangpet a bayad ti sinuratmi, ‘inkam’ isukat idiay Buguey. Inum daytan, a, nga agpatpatnag.”

“‘Di pay awan yawidyo no kua?”

“Adda latta, a. 1960s idi. Ti bayad ti sarita ket trenta ngem ti met sangakaban a bagas ket nasurok la a dies.”

Nagkuentaak a dagus: Ti sangakaban ita ket nasurok a sangaribu. Di nasurok koma metten a tallo ribu ti bayad ti maysa a sarita? (Aniat’ makunayo, Appo a taga-Bannawag ken Rimat?) “Nagmayat gayam idi, a.” Kasla nakatakuatak iti kabaruanan nga imbension iti isemko.

Intuloyna ti nanglagip kadagiti padasna iti panagsuratan nga ad-adda a nangbatombalani kadakami a mangipateg iti Literatura Iloko. Nadakamatna met ti pamiliana: nga agingga ita, dina maiwaksi ti balasangna a pimmusay bayat ti panagadalna iti abogasia.

Agingga nga inawismi ti panagsuratna iti Rimat. Trinatarmi dagiti mabalin nga itulongna iti magasin. Kamaudiananna, dinawatmi ti pammalubosna iti panangipablaakmi iti saritana a Littogaw. Iti kasudian nga isemna, nagtung-ed.

Nagpakadakami ta nawatiwat ti pagawidanmi. Inyawisna ti panagsublimi. “Uray singkuentanton ti plete nga agpa-Aparri, umaykamto manen,” impasingkedmi.

kastan, mang itong...

2004-03-24T12:17:00.000+08:00

Nakalaladingit man a maammuan a maysa manen kadagiti kalaingan a mannurat nga Ilokano a kabsat, kadua ken gayyemtayo ti pimmusay. Kasinsina laeng ti maysa idi napalabas nga Aldaw dagiti Puso, ni daydi Apo William V. Alvarado ti Umingan, Pangasinan, simmaruno met a nangisurat iti 30 ti maysa kadagiti maibilang a teddek ti agdama a Literatura Iloko, maysa kadagiti kagagetan ken kasaetan ken kaaduan iti pammadayaw a naapit a pakairamanan ti Pedro Bucaneg Award, ni Apo Meliton Galinato Brillantes ti Aparri, Cagayan a pimmusay itay Marso 19.

Nakalaladingit, wen, nangruna kadakami ditoy ATILA, ta maysa kadagiti naayat a timmulong ni Mang Itong iti umuna a panagpasalipmi babaen ti panangipatulodna iti mabalin ket maysan kadagiti kauudian a putarna a sarita, ti "Dagiti Malalaki a Tanod iti Barangay Cawcawwati," a maysa met ngarud kadagiti napili a nangabak. Di bumurong a maysa daytoy a sarita kadagiti nagrigatan ni Mang Itong a sinurat maigapu iti panagsalogen ti pigsa wenno salun-atna, maibilang ngarud nga obramaestra nga insambotna, ket mapagasatan unay ti ATILA iti daytoy, ta iti maudi a ganggandat ken panangitultuloy latta ni Mang itong nga agsurat, adtoy nga adda pay maysa a putarna a naikamakamna ti maysa pay ken maudin a premio ken pammadayaw ken kas maysa pay a datonna nga obra para iti impatpategna a Literaturana.

Kas elehia ti ATILA, adtoy ti maysa a salaysay ni Apo Jimmy A. Agpalo, Jr., nga agpaay ken ni Mang Itong....

Dios ti Kumuyog, Ka Itong Brillantes
ni Jimmy M. Agpalo, Jr.

Uray pay no immunakan
Dinakam pinanawan
Sibibiagkanto latta
Iti Literatura Ilokana…

Ti panagngudot’ pluma
Ket saan a panagpakada,
Ngem iti panagngudot’ biagmo
Sigurado a kailiwdakanto…

Dios ti kumuyog, Ka Itong
Iti panaginanamon sabali a lubong…

Wen, kailiwdakanto, Ka Itong. Nabagas dagiti dawa nga inapitmi iti bangkagmo. Inapitmi kunak, ta dika nagpaidam a nangiburay kadakami iti rumbeng a taluntonenmi iti dana ti panagsuratan tapno makagtengkami met iti yuyeng dagiti bituen ti Literatura Ilokana…

TI GUMIL ABS (Aparri, Buguey, Sta. Teresita)

GUMIL Agtutubo, kunam pay idi a pangawag ti GUMIL ABS, para kadagiti agtutubo a mannurat a saan ket nga agdadamo a mannurat. Asideg ti pusok ti GUMIL ABS ta iti talonna nga immuna a nakaapitak iti kaunaan a balligi iti tay-ak ti salip ti sarita. (SARIDANDAN, 3rd Prize, General Eduardo Batalla Literary Awards).

Napintas daydi sirsirmataem a pagturongan ti GUMIL ABS: ti pannakaipasngay koma kadagiti baro a sulbod ti mannurat nga agtaud iti Aparri, Buguey ken Sta. Teresita. Saanka a napaay, Ka Itong, namsek dagiti apit ni Jovymar Tactac, ngem nakarkaro manen ken Ariel Tabag ta adda latta ti apitenna kadagiti tumapoganna a pasalip. Ni Abril? Wen, ni Abril Varilla, nupay indissonansan ti plumana, saan ket a nanglipat, ta adda latta met a makiar-arukattit kadagiti mannurat iti internet.

TI IMMULAM ITI PANUNOTMI TI REGGET

Inellekanmi idi iti insurom a regget tapno agbalinkami a naan-anay a mannurat. Wen, saanka a nagbiddut: no awan ti regget nga agsurat, saan a makagteng iti gungun-oden a tapaw ti balligi.

Wen, no dumteng ti upay iti panagsurat, (ta maupay met ti maysa a mannurat) lagipek laeng ti ti kinareggetyo a dua nga agsurat ken ni Kayong Diony (Dionisio S. Bulong), ta imoskiteruanyo a dua iti inkay panangtugtugkel ti makinilia.

Diak la ammon ita, kadagiti agtutubo a mannurat no maaramidda dayta a kinaregget nga agsurat: a saan a lapped dagiti lamok ken ti kuridemdem a saingan. Daytoy a kinareggetyo a dua, ti immulam kadakami. Kinaregget ti dua nga agbarkada.

Kinaregget. Wen, isu met laeng daytoy manen, ti immula ni manong Reynaldo A. Duque iti panunotko. Daytoy a kinaregget no apay a dagiti BIG FOUR iti Literatura Ilokana ti kararaniagan iti bituen. Uppat nga agbabarkada idi agtutuboda, Reynaldo A. Duque, Frank Quitazol, Lorenzo Tabin ken Leonardo Belen. Wen, saan a gapu dayta “Sangaribu ket Maysa Tawa ti Langit” iti diding ti boarding houseda, no di ket iti nalaus a panagayatda iti literatura ti darada.

Kinaregget, wen, kinaregget! Immula met ni Pedrito Sanidad iti panunotko. Ti kinareggetda nga agkakasinsin: Pedrito Sanidad, Eldorado Licos ken Alfredo Mabalot, ta bay-an pay la ti agtudok iti tabako no katabok ti panagsurat iti sarita ken daniw.

Ngem sika, Ka Itong, ti kaunaan a nangimula iti panunot Iti kinaregget.

DAGITI TUGOTMO

Taldiapanta man dagiti tugotmo iti literatura. Ay, nalabonda! Adda ti Bannawag Annual Short Story Writing Contes, GRAAFIL, ETTI, GETSMAIL ken ti ATILA.

Adu dagitoy a sinuratmo, ngem manggaw-isak laeng iti sumagmamano a saritam: Saankonto a malipatan ti “Bulong iti Sab-ok ti Angin,” ta ngamin, “Saan a Marukod ti Dara” iti “Bukel ti Agsapa.” “Ta Kasano Koma a Dakamaten” ti “Angkla” ken ti “Ti Atang, ti Temtem ken ti Sangapuon a Mangga” ti kinaaddan, wen, kinaadda ti “Ti Kalintegan ti Suelas ti Sapatos.” Eleksion manen, Ka Itong, maaguantaran ngata a maaywanan “Dagiti Malalaki a Tanud iti Brgy. Cawcawati” “Ti Eleksion iti Barangaymi?”

Kadagiti nobelam: Saan ngata a ni “Kir-is” wenno ni “Arlong Buaya” ti “Ti Nangisit a Didiosen iti Bantay Quigao(?)” Ti “Ti Apuy iti Kabambantayan" ket isu da “Biuag ken Malan-a: Dagiti Malalaki iti Cagayan” ken da “Alla ken Cappan.” Wen, hustoka la unay, Ka Itong, “Saan a Pamulinawen Amin a Bato” “No Agbukar ti Busel, “ “Kabagis,” ngamin, “Nabanglo Pay ni Mayyang” isu a kunaem latta nga ipukkaw: “Batognan, Asawanan!”

(Dagiti naka-ITALICS isuda ti paulo dagiti sinuratmo.)

DAKKEL A PUSO

Kuna ni Ading Ariel (Tabag) iti emailna, dimmakkel kano dayta pusom, nga isu ti rason no apay a pimmussiawka ken ken nangpasalog ti pigsam.

Makaluaak la unay, ta sangapulon a tawen ti napalabas, dayta met ti nakita dagiti gagayyem a doktor a sagsagabaek iti laksid dayta nay traydor a hayblad.

Kastansa, ngamin “dakkel unay ti panagpuspuso dagiti mannurat,” saan kadi? Dakkel ti panagpuspusoda iti Literatura Ilokana.

DIOS TI KUMUYOG…

Dios ti Kumuyog, Ka Itong. Idi Enero, innalan ni APO ti maysa met a malalaki a mannurat iti Literatura Ilokana, ni Tang Tony (Antonio S. Encarnacion). Idi Pebrero, simmaruno ni Ka William V. Alvarado. Sa ita a bulan ti Marso, sika met ti akimbatang, Ka Itong.

Ala, wen, ala, immunakayon. Ta adda ti umun-una, adda ti maud-udi. Sumarunokaminto met, ta alangan met nga agbantaykami ditoy lubong, he-he-he! (Agpakatawaak latta, uray no agluluak a mangsursurat kadaytoy.)

Dios ti kumuyog, Ka Itong…..

pannakipagrikna ti atila

2004-03-15T15:12:00.000+08:00

Makipagladingit ti ATILA kadagiti naulila ni Apo Eugenio Matutino, 74, ti Batac, Ilocos Norte a pimmusay idi Lunes. Tatang ni Marilyn Matutino Fortenberry, ken katugangan ni Bobby Fortenberry, naayat nga sponsors ti ATILA, ni Apo Eugenio. Idawatmi iti amin a gagayyem, kakabsat, kakadua ti intay' panangikarkararag iti pimmusay a patgen nga ama da kakabsat a Maria ken Bobby. Yawattay' met ti naimpusuan a pannakipagrikna kadagiti patpatgen a napanawan ni Apo Eugenio.

special award

2004-03-11T11:29:00.000+08:00

...Napundar ti ATILA tapno mangkibin, mangtapaya ken mangtaripato aglalo kadagiti gumangganetget wenno agpanggep a mannurat (wenno nakarusingen a mannurat iti agdama) iti masakbayan...

Kasta man ti nadakamat kas maysa kadagiti kangrunaan a panggep ti ATILA. Ket iti dayta a gagem, nangpili ti ATILA ken dagiti hurado iti kalkalpas a Salip ti Sarita 2003-2004, iti maysa a mannurat a maipaayan iti naisangsangayan a pammadayaw kas panangbigbig iti regget ken ganetgetna a naggandat, nagkalikagum, nagpadas a makibalubal, makigasanggasat iti salip iti baet ti makuna a kinaagdadamona kas mannurat ken agsursurat. Agdadamo, wen, ngem babaen ti inlabanna a sarita, naawis ti imatang ken nakarit ti panangimutektek dagiti hurado ta kadagiti amin a naisalip a masao a gapuanan dagiti makuna pay laeng nga agdadamo, naisalumina ti nasao a sarita ket rebbengna a maikkan iti pammigbig ken pammadayaw a nasursurok ken napatpateg ngem iti agas laeng ti bannog wenno pangliwliwa a gunggona.

Ti makuna a discovery ti ATILA 2003-2004, isu ni Apo Charito Chavez, tubo ti Narvacan, Ilocos Sur ngem agnaeden iti Ohio, Estados Unidos ti America, babaen ti saritana a "Ti Puso ken Panunot ti Maysa a Kabsat a Polis."

Congratulations!

(Panangilawlawag: Parbo a nagan ti "Charito Chavez" ngem indawat ti autor a daytoy ti maaramat iti aniaman a panangiwaragawag wenno panangipablaak, imbes a ti pudno a naganna.)

virus!

2004-03-08T18:19:00.000+08:00

Maipapan iti maysa nga email/attachment virus a madama ita nga agat-atake wenno agsaksaknap iti sangalubongan, ti imasna ket pati dagiti email nga ar-aramaten dagiti taga-ATILA ket inatakar daytoy a virus!

Dumawatkami iti dispensar, appo, gagayyem, kadagiti maaw-awatyo nga unsolicited emails nga aggapu kadagiti email addressmi nga addaan attachment. I-deleteyo a dagus no maawatyo, diyo lukluktan ti attached file a kakuyogna tapno saan a ma-activate wenno ma-execute ti virus. Auto-email ngamin daytoy a virus, no ti computer wenno system ken apektado alaenna amin nga email address iti address book ket ipatulodna ti bagbagina nga awan pannakaammo ti akincomputer wenno ti akin-email address iti nausar nga account. Pagdaksanna pay, uray no agus-usarka iti web-based a free email accounts kas iti Hotmail, Yahoo! wenno Myway ket mai-send latta ti virus ta addaan daytoy iti bukod a sistema a mangipatulod ken mangiwaras iti bagbagina (addaan iti makuna a bukodna a SMTP [simple mail transfer protocol] client engine).

Para iti ad-adu nga inpormasion maipapan iti daytoy a virus, a managan Netsky, kitaen ditoy wenno ditoy pay.

atila 2003-2004 winners

2004-03-08T10:04:00.000+08:00

Iti kamaudiannanna, adtoyen dagiti sarita (ken mamannurat) a nangabak iti Salip iti Sarita 2003-2004 ti ATILA:

Umuna a Gunggona: DAGITI DATON A SABONG ITI RIO DE LAOAG ni Reynaldo A. Duque
Maika-2 a Gunggona: DATON PARA ITI INA A DAGA ni Rodgerry Rodriguez
Maika-3 a Gunggona: GI JOE ni Noli S. Dumlao
Maika-4 a Gunggona: LADAWAN ni Ariel S. Tabag
Maika-5 a Gunggona: DAGITI MALALAKI A TANOD ITI BARANGAY CAWCAWWATI ni Meliton Gal. Brillantes

Congratulations kadagiti napagasatan a mannurat!

Agyaman met ti ATILA kadagiti amin a nakisalip!

Padaanan pay ti pannakaipakaammo ti maysa nga agdadamo a mannurat nakaragpat iti ATILA Special Award!

Padaanan met ti kritisismo/paliiw/amiris dagiti hurado.

top 7, top 5, tappuak

2004-03-08T08:59:00.000+08:00

Dagitoyen ti pili/pinili dagiti hurado a sarsarita kas kapipintasan ken/wenno kasasayaatan iti salip ti ATILA 2003-2004.

PROSESO TI PANAGPILI

Iti wagas ti panagpili, umuna, nangilasin dagiti hurado iti pito a kapipintasan a sarita manipud kadagiti qualified nga entries. Maikadua, kadagiti pito, nangpilida manen iti lima a kapintasan/kasayaatan. Maikatlo, kadagiti lima a kapintasan/kasayaatan, nangpilin ti tunggal hurado iti bukodna listaan iti umuna agingga maikalima a puesto. Maudi, nadagup ti iskor dagiti listaan ti tunggal hurado ket isu daytoyen ti nakaibasaran dagiti pinal nga agsasaganad a puesto (umuna agingga iti maika-5).

LUCKY 13

Manipud iti 18 a sarita a naidatag ken naawat iti salip, 13 laeng ti simrek iti opisial a listaan a pagpilian dagiti hurado. Ti dadduma, kalpasan ti maulit-ulit a panangbasa ken panangamiris dagiti hurado, naikeddeng a madiskalipika gapu iti saanda pannakasurot iti sumagmamano nga annuroten ti salip. Dagiti sumaganad dagiti qualified entry:

AGARAGAAG LATTA DAGITI MARABANNUAR ni Anniniwan T. Agdama

DAGITI MALALAKI A TANOD ITI BARANGGAY CAWCAWWATI ni Kapitan Osmon

DAGITI DATON A SABONG ITI RIO DE LAOAG ni Julian Magdiwang

DATON PARA ITI INA A DAGA ni Maj. General Pro B. Lem

GI JOE by Sarhento Diego

LADAWAN by Salacnib Guerrero

ABOUT FACE ni Sergeant Major

MARMARNA ni Bituen ti Amianan

BUYOT ni Napoleon Bonaperte

TI PUSO KEN PANUNOT TI KABSAT NGA PULIS by Charito Chavez

TI SUMINIT NGA DARANG NI APO INIT ITI SITIO REBBA ni Unknown

RONDA ni J diel Vim

ARIMPADEK ni Eden Joana Paraiso

DISQUALIFICATIONS

Dua nga entry ti saan a nangtungpal iti alagaden a nasken a “maipapan wenno agpaay kadagiti pannakabagi wenno ramay ti linteg wenno adda iti serbisio ti militaria/polisia (soldado, polis, wenno uray barangay tanud)” (Pagannurotan Bilang 3).

Maysa met nga entry ti di nangsurot iti porma ti sarita a nasken a suraten: “Saan a tradisional ti pannakasurat ti isalip a sarita, masapul a panay a dayalogo wenno panagpapatang (dialogues) ti pakabuklan ti sarita. No adda man wenno di maliklikan ti pasetna a narration, nasken a saan a nasursurok ngem 15 laeng a linia (sentence) a narration ti maaramat iti pakabuklan ti sarita.)” (Pagannurotan Bilang 4).

Immanay met a nakadiskalipikaan ti dua pay nga entry ti saanda a panangsurot iti alagaden a nasken a 12 a font size ti maaramat (no naikompiuter), ken nasken a doble espasio laeng ti pannakaitype wenno pannakaencodena (Pagannurotan Bilang 5).

TOP 7

Dagiti sumaganad ti inlasin a top 7 dagiti hurado iti umuna a dupag ti panagpilida, manipud iti 13 nga entry:

Agaragaag Latta Dagiti Marabanuar

Dagiti Daton a Sabong iti Rio de Laoag

Daton Para Iti Ina a Daga

GI Joe

Dagiti Malalaki a Tanud iti Barangay Cawcawati

Ladawan

Buyot

TOP 5

Kadagiti pito a sarita a nailasin, dagiti sumaganad ti napili a top 5:

Dagiti Malalaki a Tanud iti Barangay Cawcawati

Dagiti Daton a Sabong iti Rio de Laoag

Ladawan

Daton Para iti Ina a Daga

GI Joe

Padaanan ti pannakaipakaammo dagiti nangabak!

umuna a panagranggo dagiti hurado: padaanan

2004-03-03T13:10:00.000+08:00

Padaanan ti resulta ti umuna a panagranggo dagiti hurado kadagiti kualipikado nga entries iti ATILA '03-'04.

Maipasigud a pito a sarita dagiti nagasat a napili para iti umuna a panagranggo dagiti hurado, manipud iti bukod a pili wenno listaan ti tunggal hurado. Manipud met itoy a pito a sarita, mangpilinto manen dagiti hurado iti lima a sarita para iti maikadua a panangranggoda.

Padaanan!

nayaw-awan ngem nabirokan

2004-03-03T08:06:00.000+08:00

Maysa pay a sarita ti nainayon iti opisial a listaan ti entry iti ATILA '03-'04. Nasapa a naipatulod daytoy babaen ti email ken nasapa met a naawat/dimmanon ngem gapu iti sumagmamano a teknikal a problema wenno rason ket saan a dagus a naadaw ken nabasa.

Daytoy ti sarita a DATON PARA ITI INA A DAGA ni Maj. General Pro B. Lem. Isu daytoy ti maika-18 nga opisial nga entry ket nairaman kadagiti kualipikado nga entries a naipaima kadagiti hurado.

Pamakpakawanan ni Apo Maj. General Pro B. Lem ken dagiti maseknan daytoy a panagkamtud (a teknikal).

Daytoy ngarud, manen, dagiti 18 nga opisial nga entry:

BUYOT ni Napoleon Bonaperte

SADIRI ni Lorimar Legrand

TI PUSO KEN PANUNOT TI MAYSA NGA KABSAT NGA PULIS ni Charito Chavez

BATON-LAGIP ni Bato Ni Lagip

DAGITI DATON A SABONG ITI RIO DE LAOAG ni Julian Magdiwang

DARA TI GERILIA ni Bonifacio T. Padsan

PEON ni Ahedres Adik

TI SUMINIT NGA DARANG NI APO INIT IDIAY SITIO REBBA ni Unknown

AGARAGAAG LATTA DAGITI MARABANNUAR ni Anniniwan T. Agdama

RONDA ni J. Diel Vim

KARIT ni Baro a Kristo

MARMARNA ni Bituen T. Amianan

ABOUT… FACE! ni Sergeant Major

DAGITI MALALAKI A TANOD ITI BARANGAY CAWCAWATI ni Kapitan Osmon

G.I. JOE ni Salacnib Guerrero

LADAWAN ni Sarhento Diego

ARIMPADEK ni Eden Joana Paraiso

DATON PARA ITI INA A DAGA ni Maj. General Pro B. Lem

paliiw kadagiti sarita a naisalip iti atila '03-'04

2004-03-01T08:07:00.000+08:00

General analysis kadagiti sarita a naisalip iti umuna a pasalip ti ATILA iti sarita: ti ATILA '03-'04
ni Art Tolentino Ignacio

The excellent becomes the permanent…
--Aristotle

Idi rinugiak a binasa dagiti naisalip a manuskrito, ti maysa a pagannurotak (iti laksid ti napusgan a pagrukodanmi) ket ti kinaulimekko--agingga a matukay ti riknak ket makariknaak iti kumulipagpag a rikna a kasla mayat nga umanamong wenno kumayakay kadagiti sarita, dayalogo a basbasaek. Ta kunak, nga apaman nga agbasbasaak, makariknaak iti yaasideg wenno yaanamong ti rikna wenno lumabanak kadagiti basbasaek--kayatko a sawen ket diak patpatien wenno di nakappapati dagiti linia a nakabartay kadagiti matak! Ngem amin a binasak a manuskrito ket kasla kumulipagpag ta kumulipagpag lattan ti riknak a kumanunong. Namimpinsanda a ginutad ti riknak kadagiti nagpipintek a dayalogo a nangbukel iti intero a sarita nga isu ngarud ti maysa wenno estrikto a maysa a nayanunsio a pagannurotan ti pasalip. Ngarud, bayat ti panagbasbasak, nariknak lattan a di rumbeng nga agpiliak, wenno iti naindemokratikoan a wagas a panagpili. Ti kayatko a sawen, imbatayko ti pilik iti makaguyugoy kaniak wenno iti intero a riknak. Ket no maguyugoyak, nakappapati metten para kaniak. Narikut unay ti mangikeddeng ken ti mangsalaknib iti pili, saan a nalaka ngem ketdi no pagariek ti mensahe aglalo kadagiti makuna a postmodern wenno innovative a teknik a naaramat iti dadduma a piksion a naisalip, maallukoy lattan ti imatangko. Kunaek met kadagiti dadduma a naisalip a kabbaro a langada a naarkosan, kunak man kadagiti ramen a kas koma self-reflexive, fabulist, magical realist, offshoots ken adda met daytay kasla agtartaray a lugan ngem awan met destinasionna.

Nagbalinak nga interesado lalo iti pakaay-aywak la unay a naarmasan kadagiti nakapigpigsa wenno nakapegpegges a rugso dagiti karakter a mangdupir wenno mangikalintegan wenno mangiduron kadagiti riknada a mangipatangken wenno mangipalawag iti ammoda a nainkalintegan met iti panagkunak! Ket dagita a karakter ket kabaelanda iti mangabbukay kadagiti agbasbasa wenno kadagiti napili iti basbasaen a readers. Sarita a pakabirokan kadagiti napintek nga epekto ti panagaramat kadagiti balikas iti tumutop a situasion ken addaan kadagiti sirmata a makabalin a mangtaripato kadatayo a parsua babaen ti panangilungalongda kadagiti naimbag wenno nalaad a napalabas wenno umno wenno di umno a tuladen wenno ipakat iti agdama. Napnuan man dagitoy kadagiti pagpanpannakkeltayo a kultura ket no ar-arigen, nangato ti ambisionda tapno iti kasta, dumakkel ti panagkita dagiti ganggannaet kadatayo iti rupa iti daytoy a nakarikrikut a lubong.

Nakarikrikut a talaga ti agpili iti maikari a mabigbig. Ngem di met, aya, pudno a dagiti napipintek a sarita ket produkto daytay kunada iti Ingles a literary art? Dagiti kakastoy a sarita ket saan latta a basta dumteng, iti panagkunak, ta naikur-itda tapno mangidanon iti mensahe. Ket mamatpatiak, a kas pangamaen iti daytoy a pasalip: ti ATILA, dagiti disisiete a naawat a manuskrito ket agpaay nga ebidensia a kabaelan dagiti mannurattayo iti agpartuat kadagiti pakasaritaan a makabael a mangilungalong kadatayo tapno aglupos dagiti imatangtayo wenno mangsaksaksi kadatayo iti inaldaw mga ar-aramidentayo lalo iti pannakigubgubaltayo iti daytoy agdama a biag!

Of course, kadagiti nakaguyugoyan ti riknak, imbatayko kadagiti naituyang nga annurotenmi a hurados, kalpasanna a dinagudagullitko manen a binasa.

Ngarud, babaen kadagiti naituyang nga alagadenmi a hurados, padaananyo dagiti pilimi a sarita a nakagutad kadagiti imatangmi tapno mabigbigda iti nanumo unay arubayan ti ATILA wenno iti narangrang nga entablado ti LITERATURA ILOKANA!

Agyamanak kakabsat.

listaan ti opisial nga entries iti atila 2003-2004 (update)

2004-02-28T08:33:00.000+08:00

17 amin ti final entries, saan a 16 kas damo a naiwaragawag. Maysa pay nga entry ti naawat ti Secretariat ket mairaman daytoy iti opisial nga entries a mapagpilian.

Dagiti ngarud sumaganad ti opisial nga entries iti Salip iti Sarita 2003-2004:

BUYOT ni Napoleon Bonaperte

SADIRI ni Lorimar Legrand

TI PUSO KEN PANUNOT TI MAYSA NGA KABSAT NGA PULIS ni Charito Chavez

BATON-LAGIP ni Bato Ni Lagip

DAGITI DATON A SABONG ITI RIO DE LAOAG ni Julian Magdiwang

DARA TI GERILIA ni Bonifacio T. Padsan

PEON ni Ahedres Adik

TI SUMINIT NGA DARANG NI APO INIT IDIAY SITIO REBBA ni Unknown

AGARAGAAG LATTA DAGITI MARABANNUAR ni Anniniwan T. Agdama

RONDA ni J. Diel Vim

KARIT ni Baro a Kristo

MARMARNA ni Bituen T. Amianan

ABOUT… FACE! ni Sergeant Major

DAGITI MALALAKI A TANOD ITI BARANGAY CAWCAWATI ni Kapitan Osmon

G.I. JOE ni Salacnib Guerrero

LADAWAN ni Sarhento Diego

ARIMPADEK ni Eden Joana Paraiso

Padaanan ti umuna a ranking dagiti hurado iti sangapulo a kangatuan (top ten) kadagiti listaanda!

pagannurotan ti maikadua a salip ti atila iti 2004-2005

2004-02-26T10:07:00.000+08:00

Adtoyen ti maysa pay a pasalip ti ATILA iti 2004-2005. Daytoy ti maikadua a salip, immuna ti Salip iti Puturistiko a Sarita. Kinapudno, naggiddan a naisingasing ken nainaw dagitoy a dua a salip ngem immuna a nasango ken naiwaragawag ti salip ti futuristic fiction kabayatan a maad-adal pay ti salip ti daniw. Madlawmi ngamin a nabayagen nga awan nagpasalip wenno agpaspasalip iti daniw. No dikam' agriro, kaudian ti salip ti dandaniw kagimongan nga inesponsoran ni Dr. Godofredo Reyes idi tawen 2000. Agingga ita. Ket ita a tawen, nirugian ni Apo Reynald Antonio iti RFAAFIL ti salip ti daniw. Pasarunuan met daytoy ti ATILA iti pananginanama nga agriing, aginat, agmurmuray, makarit dagiti adu a mannaniw nga agur-uray iti pakibalubalan ti pluma ken sirmatada.

(Update: Nagrirokami! Adda dagiti nagpaspasalip/agpaspasalip iti daniw manipud pay 2000. Mairaman ditoy ti Mannaniw ti Tawen ti COVLLA/Salinong ni Atty. Nole V. Lansangan ken ti tinawen nga Abuan-Valdez Awards for Iluko Literature (AVAIL) ni Apo Baldovino Ab. Valdez)

Adtoy ngaruden ti pagannurotan:

Art Tolentino Ignacio Literary Awards 2004-2005
Salip iti Daniw

Dagiti Pagannurotan:

Silulukat ti salip iti amin a mannaniw nga Ilokano iti Filipinas ken iti uray ania a pagilian. Mangrugi ti salip iti Marso 1, 2004 ken aggibus iti Enero 31, 2005.

Koleksion ti daniw, a buklen ti 12 wenno nasursurok pay, ngem saan a sumobra iti 15 a dandaniw, ti suraten kas entry. Silulukat ti tema ti putaren a daniw ngem maipangruna dagiti mangiladawan iti kultura ni Ilokano. Nawaya ti mannaniw iti estilo a kayatna a panangputar wenno panangsukog iti dandaniwna.

Nasken a naimakinilia ti isalip a dandaniw iti doble espasio iti 8-1/2” x11” a bond paper. Nasaysayaat pay no naikompiuter ti isalip iti font size a 12 ken font face a Times, Times New Roman, Helvetica wenno Arial. Uppat a kopia ti manuskrito ti koleksion ti dandaniw ti mangbukel iti entry. Parbo a nagan ti usaren ti mannaniw kas byline iti entryna. No maikompiuter ti maisalip a manuskrito, mapakuyogan koma ti hard copy iti diskette a naglaon iti dua a MS Word document (.doc wenno .rtf) a kopia ti entry. No ikoreo ti manuskrito a maisalip, pakuyogan ti entry iti nakarikep a sobre a naglaon iti paulo ti koleksion ti daniw, parbo ken pudno a nagan, kompleto/umno nga adres ti agdama a pagtaengan wenno pagobraan, email address ken cellphone/telephone number (no adda), maysa a 2”x2” a kaudian a ladawan, ken ababa a pakasaritaan ti biag. No i-email ti entry, pakuyogan daytoy iti dua a MS Word document (.doc wenno .rtf) a naglaon iti paulo ti koleksion ti daniw, parbo ken pudno a nagan ti mannaniw, ken ababa a pakasaritaan ti biagna; pakuyogan met iti scanned a ladawan (no adda), i-attach met laeng daytoy iti email.

Maysa laeng a koleksion ti daniw nga orihinal, bukod a putar, saan a patarus manipud iti aniaman a pagsasao, di pay naipablaak iti aniaman a publikasion a printed (libro, magasin, pagiwarnak, kdpy) wenno digital (e-book, CD-ROM, DVD-ROM, internet, kdpy) ken di pay nangabak iti aniaman a salip, ti mabalin nga isalip ti tunggal mannaniw.

Agbalin a kukua ti esponsor dagiti mangabak a daniw ken addaan karbengan a mangedit ken mangipablaak kadagitoy iti libro, magasin, pagiwarnak, internet, iti man printed wenno digital a format, nga awan sungsungbatanna iti mannaniw. Nupay kasta, agtalinaed ketdi ti copyright iti mannaniw.

Pinal ti pangngeddeng dagiti hurado, saan a maibabawi ti naikeddeng a nangabak, malaksid no matakuatanto a sinalungasing ti nangabak a mannaniw ti Pagannurotan Bilang 4. No naglabsing ti mannaniw, maibabawi ti premiona ken mapawilanton a makisalip pay kadagiti sumarsaruno pay a pasalip ti ATILA.

Paset ti salip ti panangsuratto dagiti agpaay a hurado iti bukodda a critical analysis wenno paliiw kadagiti amin a naisalip a daniw. Maisingasingto a maipablaak met dagitoy a paliiw wenno makuna ti/dagiti hurado iti magasin wenno libro ken dadduma pay a medium a pakaipablaakan dagiti mangabak a daniw.

Dagiti gunggona: Umuna a Gunggona: $350.00. Maikadua a Gunggona: $300.00. Maikatlo a Gunggona: $250.00. Maikapat a Gunggona: $200.00 ken Maikalima a Gunggona: $150.00 Maipaayan pay iti Plake ti Pammigbig dagiti mangabak.

Mapadayawanto dagiti mangabak kabayatan ti National Convention ti GUMIL Filipinas iti Kalgaw 2005. Dagiti mangabak a saan a makapan iti GF Convention, maibusonto wenno mapanto idanon ti esponsor ti premioda.

Ipatulod dagiti entry itoy nga adres: Salip ti Daniw, ATILA 2004-2005, c/o Daniel Nesperos, Liwayway Publishing, Inc., 2249 Chino Roces Avenue, 1231 Makati City, Philippines. Kadagiti adda accessna iti Internet, i-email ti entry iti ignac@myway.com, kampilan001@yahoo.com wenno artesobra@yahoo.com. Nasken a maipatulod amin nga entries iti di naladladaw ngem Enero 31, 2005.

pasirip kadagiti naisalip 2

2004-02-25T13:12:00.000+08:00

Adtoy pay ti sumagmamano a parapo manipud kadagiti entry a sarita iti ATILA 2003-2004:

PASIRIP 3:

      …..Mayarig ti balaymo iti pagiliantayo, kabsat. Binasakbasak dagiti ganggannaet. Nasagradoan a lugar ti pagtaengan. Apay nga itulokmo a sakupen dagiti singkit? Kasta met ti Filipinas. Daytoy ti pagtaengantayo, kas Filipino. Sagrado daytoy a lugar. Ngem immay binasakbasak dagiti Hapones. Ania ti aramidem no umay basakbasaken ti maysa a sangsangaili ti balaymo, kabsat?

      Agpungtotak! Makapatayak la ketdi iti tao no kasta ti aramidenda iti balayko!

      No kasta ngarud, ammomon ti rumbeng nga aramidem manipud ita, kabsat. Basakbasaken ita dagiti Hapones ti Ilocos Norte a pagtaengam.

      A-ania ti aramidek?

      Paksiatem dagiti ganggannaet nga agbasakbasak ita iti pagtaengam, pari! Salaknibam ti dayaw ti pagtaengan a timmanoram. Paksiatem dagiti singkit iti Ilocos Norte!

PASIRIP 4:

….. Saan a kabusor ti soldado. Adun ti padasko iti dangadang. Gubat ti mangtenneb iti pudno a maingel. No nasaksiam dagiti inosente a biag a naibuis gapu iti gubat maawatam siguro ti riknak. Daytoy ita ti mangidurduron kaniak a mangispal a saan ket a pumatay. Tao met ti soldado, Magda. Ammomi met ti mangaasi ken makipagrikna. Maawatam kadi dayta?

—Wen, ngem iggemmo ti dossierko, saan kadi?

—Wen. Paset ti trabahok dayta.

—Ket, ania ti natakuatam? Am just curious!

—Kayatmo a talaga a maammuan? Okay, this is what I know... Magdalena Bintocan Salvador, 27 years old, Mags wenno Maggie ditoy Diliman a pangisursuruanna. Magda kadagiti dadakkel ken kasingedna iti probinsia. Ka Jima iti nakaikappenganna a grupo dagiti rebelde ken kaayan-ayat ni Ka Omar. Nagturpos iti Sociology iti Unibersidad ti Filipinas. Community organizer kadagiti kaiskuateran iti Diliman—Ups! Nasakit daydiay, Mag!

—Nasaksakit pay ti epekto ti pannakibiangmo! You ruined my life, Atty. Rivera. Now you are trying to undermine my self-respect!

—Sika ti mangperperdi iti biagmo! Ammom ti bagim. Ammom dagiti involvementmo. Ammom dagiti aktibidadmo. Ammom nga adu ti kalabanmo! Ngem natangken ti ulom!

maysa pay salip iti atila 2004-2005

2004-02-24T11:07:00.000+08:00

Padaanan ti maysa pay a salip iti ATILA 2004-2005. Kagiddan nga inaw/singasing daytoy ti narugianen a Salip iti Puturistiko a Sarita ngem maad-adal pay ti mekaniksna sakbay a pormal a maiwaragawag ken opisial a maipaskil ti pagalagadanna.

Namnamaenmi nga adunto met laeng, wenno ad-adunto manen, ti makipartisipar iti daytoy a maysa pay a gannuat ti ATILA para kadagiti amin a mannurat nga Ilokano ken para iti Literatura a Samtoy, a kas iti adu met a nakipartisipar ken simmuporta ken sumupsuporta iti ATILA 2003-2004.

listaan dagiti naisalip

2004-02-23T13:44:00.000+08:00

Dagiti sumaganad ti naawat nga entries iti Salip iti Sarita 2003-2004, kas impakaammo ti secretariat ti salip:

BUYOT ni Napoleon Bonaperte

SADIRI ni Lorimar Legrand

TI PUSO KEN PANUNOT TI MAYSA NGA KABSAT NGA PULIS ni Charito Chavez

BATON-LAGIP ni Bato Ni Lagip

DAGITI DATON A SABONG ITI RIO DE LAOAG ni Julian Magdiwang

DARA TI GERILIA ni Bonifacio T. Padsan

PEON ni Ahedres Adik

TI SUMINIT NGA DARANG NI APO INIT IDIAY SITIO REBBA ni Unknown

AGARAGAAG LATTA DAGITI MARABANNUAR ni Anniniwan T. Agdama

RONDA ni J. Diel Vim

KARIT ni Baro a Kristo

MARMARNA ni Bituen T. Amianan

ABOUT… FACE! ni Sergeant Major

DAGITI MALALAKI A TANOD ITI BARANGAY CAWCAWATI ni Kapitan Osmon

G.I. JOE ni Salacnib Guerrero

LADAWAN ni Sarhento Diego

Padaanan ti resulta ti salip!

panangatur (manen) iti pagannurotan ti atila 2004-2005

2004-02-20T09:17:00.000+08:00

Tapno saanen a makatikaw (hopefully), ken sakbay nga ipaipablaakmi kadagiti magasin ken pagiwarnak, ken uray ta rugrugina pay met laeng, balbaliwanmi ti maysa a paset ti pagannurotan ti maikadua a salip ti ATILA para iti 2004-2005, Salip iti Puturistiko a Sarita.

Daytoy 'tay kuestionable nga annuroten, ti Pagannurotan Bilang 11, daydiay parte maipapan iti panagipatulod ken pannakaawat ti entries.

Daytoy ti agdama a Pagannurotan Bilang 11 (kas narebisar wennon naaatur):

Ipatulod dagiti entry itoy nga adres: ATILA 2004-2005, c/o Daniel Nesperos, Liwayway Publishing, Inc., 2249 Chino Roces Avenue, 1231 Makati City. Kadagiti adda accessna iti Internet, nasaysayaat no i-email ti entry iti kampilan001@myway.com, ignac@myway.com wenno binagkal@myway.com (i-attach iti email ti file ti entry agraman nakasina a file ti ababa a pakasaritaan ti biag; pakuyogan met iti scanned a ladawan (no adda), i-attach met laeng daytoy iti email). Nasken a maawat amin nga entries, a naipatulod wenno naikoreo wenno nai-email iti di naladladaw ngem Enero 31, 2005 (nasken a natimbrean ti sobre wenno pakete wenno email iti petsa sakbay wenno iti Enero 31, 2005).

Ket daytoy ti nabalbaliwan ken daytoyen ti pinal (hopefully, manen):

Ipatulod dagiti entry itoy nga adres: ATILA 2004-2005, c/o Daniel Nesperos, Liwayway Publishing, Inc., 2249 Chino Roces Avenue, 1231 Makati City. Kadagiti adda accessna iti Internet, nasaysayaat no i-email ti entry iti kampilan001@yahoo.com, wenno artesobra@yahoo.com (i-attach iti email ti file ti entry agraman nakasina a file ti ababa a pakasaritaan ti biag; pakuyogan met iti scanned a ladawan (no adda), i-attach met laeng daytoy iti email). Nasken a maipatulod amin nga entries iti di naladladaw ngem Enero 31, 2005 (nasken a natimbrean ti sobre wenno pakete wenno email iti petsa sakbay wenno iti Enero 31, 2005).

biddut!

2004-02-17T17:38:00.000+08:00

Maysa a mannap-ay iti iluko.com ti nakadlaw iti maysa a biddut iti pagannurotan ti umuna a salip ti ATILA. Dimi man la nadlaw daytoyen! Dumawatkami iti dispensa iti amin a maseknan. Mea culpa!

Ti biddut? Ti pannakailanad ti pannakaawat dagiti entries mainaig iti deadline ti panagipatulod!

Iti Pagannurotan ti ATILA '03-'04, iti pagannurotan #12, kastoy ti nailanad: "Nasken a maawat amin nga entries iti di naladladaw ngem Pebrero 15, 2004." Biddut daytoy! Agparparang a Pebrero 15 ti deadline ti panagawat a di ket koma ti pannakaipatulod!

Ngarud, kastoy koma ti nailanad: "Nasken a maawat amin nga entries a naipatulod wenno naikoreo wenno nai-email iti di naladladaw ngem Pebrero 15, 2004" sa pay koma maikkan iti pannakailawlawagna a kastoy: "nasken a natimbrean ti sobre wenno pakete wenno email iti petsa sakbay wenno iti Pebrero 15, 2004" tapno saanen a makatikaw, ken tapno maiparis iti kuna iti pagannurotan #2 a "Nangrugi ti pasalip iti Nobiembre 1, 2003 ken aggibus iti Pebrero 15, 2004."

Daytoy a biddut, nairaman met laeng iti pagannurotan ti maikadua a salip (ATILA '04-'05) ta isu met la nga isu a document file, nabalbaliwan laeng ti sumagmamano a pasetna. Ngem itan binaliwanmin ti pagannurotan ti maikadua a salip tapno maatur ti biddut.

Manen, pagyamanan ti ATILA ni Apo Nakisalip iti pannakaduktal ken panangibagana iti daytoy a biddut.

baro a laon

2004-02-17T17:02:00.000+08:00

In-inut, ik-ikkantayo iti linaon dagiti blanko a links daytoy a blogsite. Madama a maar-aramid ti kaaduan. Addan laon ti dadduma.

Ita, am-ammuen dagiti sponsor ti ATILA '03-'04, ken ammuen metten ti kausa ken gagem ti ATILA.

umuna a pasalip ti atila para 2004-2005 (revised)

2004-02-16T16:23:00.000+08:00

Adtoyen, appo a mannurat, gagayyem, naluktanen ti maikadua a pasalip ti ATILA. Nagsapan? mabalin a makunayo ta wen, met di pay nga agpayso nalnalpas (a napili wenno naawardan) ti ATILA 2003-2004 ket sapay nga adda manen baro a salip? Ngem di kadi nagsayaat, kakaisuna a nakagaggaget ken nakaregregget ti/dagiti sponsors ti ATILA, ket ita adtoy manen a maipasaruno ken maisapsapa ti maikadua a pasalip ti ATILA! Wen, tapno maaddaanen iti naan-anay a panawen ti amin a mannurat a mayat a makisalip, ita pay laeng rugiandan ti agputar iti pakibulangda a baud iti daytoy a derby iti Literatura Iluko (wen, kas madlaw, naikadadakkel pay dagiti premio a doliar, ama!) ket maikkanda iti adu a panawen a mangtaraken, mangpapigsa, mangpaandur, mangpaunget kadagiti ipallotda a sarita!

Adtoy ngaruden:

Art Tolentino Ignacio Literary Awards 2004-2005
Salip iti Puturistiko a Sarita

Dagiti Pagannurotan:

Silulukat ti pasalip iti amin a mannurat nga Ilokano, agdadamo ken saan, iti man Filipinas wenno iti uray ania a pagilian.

Nangrugi ti pasalip iti Enero 1, 2004 ken aggibus iti Enero 31, 2005.

Ti sarita a suraten ket puturistiko, agwerret kadagiti tao, lugar ken pasamak iti masakbayan, iti sumaruno a 25 wenno 50 wenno 100 a tawen manipud iti agdama. Nasken a maipapan kadagiti Ilokano, mailugar ken mapasamak iti Filipinas kangrunaan iti Kailokuan, ti putaren a sarita. Saan a nasken a maipapan iti siensia wenno teknolohia ti tema wenno pakabuklan ti sarita, ketdi, maipangruna a matratar ti kultural, sosial, politikal-ideolohikal, ekonomikal wenno uray nainrelihionan a kasasaad ni Ilokano wenno ti Kailokuan iti masakbayan. Nupay kasta, no saan a maliklikan a mataked ti siensia wenno teknolohia mainaig kadagiti naagapad a kasasaad, saan koma nga agtinnag a bin-ig a science fiction ti sarita.

Saan a makedngan ti kaababa wenno kaatiddog ti isalip a sarita, nawaya ti autor a mangeddeng no mano a panid ti manuskrito nga isumitena. Nasken met a naimakinilia ti isalip a sarita iti doble espasio iti 8-1/2” x11” a bond paper. Nasaysayaat pay no naikompiuter ti isalip iti font size a 12 ken fontface a Times New Roman wenno Arial. No naikompiuter ti isalip, pakuyogan ti kopiana iti diskette a naglaon iti file ti entry (iti MS Word document (.doc wenno .rtf) a format). Uppat a kopia ti manuskrito ti sarita ti mangbukel iti entry. Parbo a nagan ti usaren ti autor kas byline iti entryna. Pakuyogan ti entry iti nakarikep a sobre a naglaon iti paulo ti sarita, parbo ken pudno a nagan, kompleto/umno nga adres ti agdama a pagtaengan wenno pagobraan, email address ken cellphone/telephone number (no adda), maysa a 2”x2” a kaudian a ladawan, ken ababa a pakasaritaan ti biag.

Maysa laeng a sarita nga orihinal, bukod a putar, saan a patarus manipud aniaman a pagsasao, di pay naipablaak iti aniaman a publikasion a printed (libro, magasin, pagiwarnak, kdpy) wenno digital (e-book, internet, kdpy) ken di pay nangabak iti aniaman a salip, ti mabalin nga isalip ti tunggal autor.

Agbalin a kukua ti esponsor dagiti mangabak a sarita ken addaan karbengan a mangedit ken mangipablaak kadagitoy iti libro, magasin, pagiwarnak, internet, iti man printed wenno digital a format, nga awan sungsungbatanna iti autor. Agtalinaed ketdi ti copyright iti autor.

Pinal ti pangngeddeng dagiti hurado, saan a maibabawin ti naikeddeng a nangabak, malaksid no matakuatanto a sinalungasing ti nangabak nga autor ti Pagannurotan Bilang 5. No naglabsing ti autor, maibabawi ti premio ket maparitanto metten a makisalip pay kadagiti sumarsaruno pay a pasalip ti ATILA.

Paset ti pasalip ti panangsuratto dagiti agpaay a hurado iti bukodda a critical analysis wenno paliiw kadagiti amin a naisalip a sarita, nangabak man wenno naabak. Maisingasingto a maipablaak met dagitoy a paliiw wenno makuna ti/dagiti hurado iti magasin wenno libro a pakaipablaakan dagiti mangabak a sarita.

Dagiti premio: Umuna a Gunggona: $550.00; Maikadua a Gunggona: $450.00; Maikatlo a Gunggona: $350.00; Maikapat a Gunggona: $250; ken Maikalima a Gunggona: $200.00. Maipaayan pay iti Plake ti Pammigbig dagiti mangabak.

Mapadayawan dagiti mangabak kabayatan ti National Convention ti GUMIL Filipinas iti Kalgaw 2005. Dagiti mangabak a saan a makapan iti GF Convention, maibusonto wenno mapanto idanon ti esponsor ti premioda.

Ipatulod dagiti entry itoy nga adres: ATILA 2004-2005, c/o Daniel Nesperos, Liwayway Publishing, Inc., 2249 Chino Roces Avenue, 1231 Makati City. Kadagiti adda accessna iti Internet, nasaysayaat no i-email ti entry iti kampilan001@myway.com, ignac@myway.com wenno binagkal@myway.com (i-attach iti email ti file ti entry agraman nakasina a file ti ababa a pakasaritaan ti biag; pakuyogan met iti scanned a ladawan (no adda), i-attach met laeng daytoy iti email). Nasken a maipatulod amin nga entries iti di naladladaw ngem Enero 31, 2005 (nasken a natimbrean ti sobre wenno pakete wenno email iti petsa sakbay wenno iti Enero 31, 2005).

pasirip kadagiti naisalip 1

2004-02-16T09:45:00.000+08:00

Agsangpet/nagsangpeten dagiti manuskrito ti entries iti ATILA '03-'04. Ket adtoy, ipasiripmi kadakayo ti sumagmamano a paset wenno parapo dagiti entry. Dimi ketdi ibaga ti paulo ken parbo a nagan ti autor dagiti manuskrito a nangalaanmi kadagitoy a parapo. Iwaragawagminto ditoy ti kompleto a listaan dagiti naawat nga entry.

PASIRIP 1:

"'...Apay nga adda gubat? Apay nga adu ti di agkikinnaawatan? Apay nga adu ti gamrud? Apay nga addakami ditoy, a makiramraman iti parikut ti sabali, ket agsagaba dagiti patpatgtenmi a napanawanmi, a di makaammo no makasublikami pay wenno ditoykami mettten a maigamay ti dara ken lasagna iti nakanganga a disierto a kas iti mabisin a buaya? Awan kadakami ti makaibaga iti sumaruno a mapasamak. Awan ti makaibaga a makaawidkaminto no bigat nga awan ti ania man a di nasayaat a mapagteng kadakami. Awan ti makaammo kadakami no agkikitakaminto pay kadagiti imbatimi a patpatgenmi. Awan ti makaibaga no kaano nga aggibus ti kastoy a gubat. No ut-utobek, madama ti gubat iti sangalubongan, ket agtultuloy ti panagsagaba dagiti mailupitlupit gapu iti kinagamrud dagiti buklis.'"

PASIRIP 2:

“Sir, ni Arcena… napuntaan. Ngem sibibiag pay laeng, ul-ulodenna ti ubing nga ip-ipan ditoy ‘yantayo. Iti panagkitak ket marigatan a makapan ditoyen, nangruna ket nakaron sa met ti panakapunta iti barukong ken iti tianna, numona ta adu ti nakasipot kenkuana. Ngem dina met ibbatan ti ubing.”

“Shit! Cover me! Cover me!”

“Sir, diyo sabten , delikado!”

BRATATAT! BRATATAT!

“Arcena, what are you doing? Apay nga insebbam ti biagmo iti daytoy nga ubing? Dimo kadi ammo a karaiwara dagiti nakasipot kadatayo? What have you done?”

“Napateg… ngamin ti ub-ubing kaniak, si-sir. Awan pay nga-ngamin ubingmi ken-kenni ba-baket. Sangapulo a-a ta-wenmin, ket mailiwak u-unayen i-iti u-u-bing, si-sir….”

“Arcena, hold on. Arcena… ARCENA!!!”

topiko iti atila forum

2004-02-12T14:17:00.000+08:00

Maawiskayo a makipartisipar kadagiti forum ti ATILA. No adda kayatyo a topiko maipapan iti ATILA, wenno iti panagsuratan ken iti Literatura Iluko, mabalinyo ti manglukat sadiay (basta registered userskayon).

Napintas ti topiko maipapan iti/kadagiti pasalip iti Literatura Iluko. Naluktanen ti maipapan iti pasalip iti sarita nga insayangkat ti Bannawag magasin idi 1960s. Nailista sadiay ti titulo ken ranggo dagiti nangabak a sarita ken dagiti autorda iti tunggal tawen ti salip (1961-1972).

panagyaman kadagiti mannarungkar

2004-02-11T17:04:00.000+08:00

Pagyamananmi unay dagiti kakabsat ken gagayyem a simmarungkar/sumarsarungkar iti ATILA website ken iti ATILA forum!

Kadagiti mayat a makipartisipar iti forum, nasaysayaat, appo, no agrehistrokayo tapno maaddaankayo sadiay iti naan-anay a user account tapno maaramatyo dagiti adu a feature ti forum ken nangnangruna, tapno maaksesyo dagiti forum ken threads nga agpaay laeng kadagiti forum members (saan a maakses no "guest" laeng).

Kadagiti met nagrehistron, mabalinyo ti sumrek iti forum ditoy.

atila 2004-2005, sumaruno a salip: padaanan!

2004-02-10T16:53:00.000+08:00

Madaman a main-inaw ti sumaruno a pasalip ti ATILA para iti 2004-2005. Padaanan ti pannakaiwaragawag ken pannakaibinsabinsa daytoy a salip a manamnama (manen) a naidumduma kadagiti immun-unan a salip wenno napagsasalipan ken mainanama met a lalo a mangkarit ken ni mannurat nga Ilokano tapno ad-adda a mapagwerret wenno mapaguddogna pay ti imahinasion, sirmata, kinamanagparsuana--nangnangruna ti kinasidap ken kinasensitibona ken ti kinabisionariona iti nainkulturaan, nainpolitikaan/nain-ideolohiaan, nainsosialan, nain-ekonomiaan, wenno nainrelihionan a biag/panagbiag ni Ilokano.

Padaananyo, apo!

baro a dap-ayan ti atila

2004-02-10T15:05:00.000+08:00

Maragsakanak a mangipakaammo nga addan maysa pay nga online a dap-ayan ti ATILA! Barbareng no nasaysayaat ken naur-urnos daytoyen a pagsasarakan ken pagtutungtongantayo.

Padasenyo man ketdi, kakabsat, iklikyo laeng ti "Tungtongan" iti menu iti kanawan, wenno ti URL link iti ngato.

interaksion iti atila blogsite

2004-02-09T11:57:00.000+08:00

Adda insambot 'toy numo, kas sigud a plano ken panangipangag payen iti dawat ti dadduma a kakabsat, a benneg ti interaksion 'toy web/blogsitetayo (kitaen ti menu iti kanawan). Adtoy, adda simple laeng (manen) a pagtutungtongan wenno dap-ayan a pagilanadantayo iti makuna wenno kapanunotan maipapan iti agdama a pasalip ti ATILA ken sumarsaruno pay a proyektona. Mabalin a temporario wenno interim pay laeng daytoy kabayatan a mabalbalabala ti nasaysayaat pay koma a pagdadanon a pagdadap-ayan (malaksid laeng kadagiti ATILA threads iti Dap-ayan ti iluko.com). Agsipud ta nai-host laeng iti libre ti nasao a pagtutungtongan, yan-anus ken pagpaspasensiaantay' latta koma pay laeng ta no kua ket adda tumpuar a popup windows ti advertisements ti host.

Mabalinyo met nga ilanad dagiti ababa a mensaheyo babaen ti sistema ti tag-board (iti babaen ti link "tungtungan").

sampol a sarita a bin-ig a panagpapatang

2004-02-09T09:51:00.001+08:00

(manipud ken ni ATI iti postena iti Dap-ayan 1 ti iluko.com)

Kas nadawat, adda indarasko a sampol ti panay dialogo a sarita. Anusanyon ta nakusel, ababa ket saan a kumpleto. Sampol la ngarud, aya? Mark this: Adda numero ti narrationna (di koma liplipatan a kinse (15) la a sentence ti mabalin a narration ti intero a sarita nga isalip). Ket maysa a TIP kadagiti agdadamo: ipan iti narrationna iti paggibusan ti kakastoy nga istoria, ngem tipden koma. Imbes nga inarrateyo, idayalogon dagiti karakter dagiti rimienta ti sarita.

DAGITI MINERO

HUY, GUAPITO DITA SULI, ‘nia ti naganmo?

Macliing. Sika ngay?

Doro. Doro ti awagda kaniak. Tagaanoka ken ‘nia ti rantam ditoy a sulsulinek?

Taga ditoyak, Bontoc!.Lepanto ti nagubraak idi. Ngem pimmanawak ta aramidendakami met la unayen a tagabo dagiti taga Patad idiay. Sika ania met ti rantam ditoy?

Siak ti ti immuna a nagdamag kenka, gyem. Ti balitok met ti rinantam?

Wen! Uray sika?

Ket wen a, nagdagmel ket ti di mangayat iti balitok!

‘Nia ti aramidem kadagiti rantaem a balitok?

Estupido dayta a damdamagem. ‘Nia met ti naganmo, sika?

Cario.

“Bal’tok met ti rantam?

Yah!

Naimutka iti balikas…. ‘Nia’t aramatem a pagkali?

Boom!

Makaringgor dayta a pamuspusam.

Madi ngata?

Hmmm…. Sika ngay dita, ‘nia ti naganmo?

Mail.

Balitok met ti rinantam ditoy?

Panagkunak datayo amin ket maymaysa ti rinantana ditoy.

(1) Kinita ni Doro dagiti adda iti masanguananna: Sika dita? Iti likudan ni Mail, ‘nia
ti naganmo?

Mariano.

Addaka ditoy ita gapu iti balitok, Mariano?

Ket wen a.

‘Nia met ti planom?

Planok latta a bukbukod,. Apay koma nga ibagakon…

Okey, Okey, dayta adda ‘ta likudam, nia ti naganna?

Damagem, a.

‘Nia’t naganmo?

Iddo.

Adda ammom Iddo a pamuspusan tapno makairugikan nga agala iti balitok ditoy?

Adda.

Ania?

Agaramid iti tunnel…

Adda rimientam?

Adda. Immayak ditoy idi lawasna ket tinestko ti bantay, natangken ti lasagna ngem kabaelantayo no agtitinnulongtayo.

Panagkunam, mayat ditoy a pangrugian ti abut? Laglagipenyo a dagiti inabutan dagidi immuna ngem datayo ket dida napatangan.

Papaayennak sa?

‘Pak koma nga aramidek dayta? ‘Nia met ti nagan dayta adda ‘ta likudam?

Magat! Sinno dagitoy a tattao ditoy?

Agbirirok iti balitok. Minero! ‘Nia’t makunam iti situasion ditoy, Magat?

Panagkunak, adutayo unay! Madi ti adu. Delikado! Daytoy met ti kaduak, a gayyemko. Ni Pedring.

P-Pedring, ti met balitok ti rantayo ditoy?

Hahahaha. Kas kaniayo. Agpapadatayto!

Maymayat ti adu ta no agtitinnulongtayo ket mabibiit ti trabaho, (2) adda nagkuna iti likudanda.

No agtitinnulong, mayat. Daytay awan ti sinnikap.

Wen, masapul ti timpuyog!

Boom!

Sinno daydiayen?

Ni Cario, dininamitanan ti bakrang ti bantay!

(3) Nagtatarayda a napan amin iti iking ti rangkis.

(4) Iti natippingan a bakras ti bantay, nagadu dagiti kasla bituen nga agrimatmat a kasla nailanang iti bakras ti bantay!

Addagitan dagitay bal…. Balitok! Balitok! Balitokkkkk!

Dikayo umarimbangaw, baka no adda makangngeg kadatayo!

Ket umayda makiagaw?

Tumaraytayo ketdi a mapan agtikapen… Kukuana maalana, sal-it! Balitokennnnnnn…

Koma a no makiagawda pay. Amangan no tagikuaendan amin!

Hahahahaha, ala irennekyo ti agala iti balitok!

Apay Doro, dika umay agala? Papanamon, Mail?

Innak ipan ti naalakon iti sang-at iti kuribotko. Napunnon ti kallugongko!

Bang! Bang! Bang!

Ne, ni Mail, pinaltogan ni Doro idiay sang-at sana inagaw ti kallugongna. Diablis a Doro!

Bratatattatttttattttaaattttt!!!! Siak ketdin ti utakanyo! Mas naut-utakak ngem dakayo amin!

blog/website ti ATILA

2004-02-07T14:53:00.000+08:00

Kamaudiananna, addan damo a taeng ti ATILA iti Web!

Damo kunak man ta mabalin a temporario pay laeng daytoy kabayatan a matamtaming ti adu pay a teknikalidad tapno naan-anayton ti panagtaeng ti ATILA ditoy cyberspace. No pay no kua mabalin met ketdi ngatan a permanente a ditoy pay laeng wenno ditoynan.

Ket pamakpakawananyon, appo, ti kinanumo pay laeng ti sitio ti ATILA; ti kinagagangayna, ti kinasimplena. Pinilik ketdi met daytoy ta mas nasaysayaat met iti panagkunak ken panagramanko ('toy simplicity ken kina-minimalist ti layout/design, nga isut' maysa a trend iti web standards ita), kas natudingan a manarawidwid iti taeng ti ATILA iti web, ngem iti dadduma a pinadasko a sistema wenno teknolohia. Popular a teknolohia iti web daytoy blog wenno blogging (manipud iti termino a "web log"). Nabayag ketdi met daytoyen nga uso kadagiti netizens kas ramit wenno remienta para iti inaldaw-aldaw a biag iti online kas online journal wenno diary wenno kas maar-aramiden, kas online self-publication (vanity publishing, kunamon no isu). Ngem saan met laengen a writers wenno dagiti agduyos iti panagsurat wenno journalism wenno diarist wenno trippers iti kurkur-it wenno kinnur-it ta agarup isuaminen a hobbyist wenno netizens ket addaanen iti bukodna a blog.

Aya, ket, intay man met ita adaptaren dayta para iti ATILA. Tapnon nalaklaka ken nawaywayatay' la a maikurit wenno mailanad ti aniaman a madagdagus a mapanunot wenno maagapad maipapan iti ATILA.

Ket wen, pamakpakawananyo, ta adtoy saan pay a kompleto daytoy a site iti nasken a laonen wenno iparang/iwaragawagna. Ngem mapadaanan amin dagita ta madamada a main-inaw/maisagsagana a maidasar ditoy. Kangrunaan dagiti sumaruno a pakaammo, palawag, sungbat kadagiti nagkaadu a banag ken pakaseknan ti ATILA.

Kabayatanna, kadagiti amin nga interesado ken uray saan nga interesado a mannurat, ipatulodyon, appo, ti pakisalipyo--adda pay walo nga aldaw manipud ita (a petsa, 2/7) sakbay ti deadline.

Alla, ngarud!

annuroten ti ATILA: sumagmamano a panangilawlawag

2004-02-07T13:54:00.000+08:00

Kayatmi koma met ngamin a maiduma ti ATILA kadagiti dadduma a salip--dayta koma met makuna a naisalumina kadagiti tradisional wenno kombensional a langa, porma, wenno balabala wenno mekaniks ti pasalip/panagpasalip. Isu a malaksid iti porma ken kita ti suraten a sarita a kas pagayatan wenno kiddaw ti esponsor, ni ATI, ninayonak met iti dadduma a saan a maekspektar kadagiti dadduma nga annuroten ti existing a paspasalip kas ammo ken am-ammotayon (kas koma iti GRAAFIL, Palanca, etc.). Uray ti RFAAFIL, naiduma met ta isu la ngarud ti kaunaan a salip a maiwaragawag wenno maaramid pay ketdi a kangrunaan iti Web wenno Internet, ken adda pay kupikopna a Reader's Choice Awards. Maiduma unay. Naisalumina.

Kasta koma met ti kayatmi a mapasamak iti ATILA 2003-2004.

Ti maipapan iti kaatiddog ti isalip a sarita wenno ti kaadu ti panid ti sarita (Annuroten #5: Saan a makedngan ti kaababa wenno kaatiddog ti isalip a sarita, nawaya ti autor a mangeddeng no mano a panid ti manuskrito nga isumitena. Nupay kasta, nasken a kapkapnekan nga ababa a sarita ti isalip a saan ketdi a mini-sarita wenno ababa a nobela daytoy.), nalabit makatikaw, ngem maikkan ti mannurat iti wayawaya nga agsurat iti kapkapnekanna a kaatiddog (wenno kaababa) ti saritana. Adu met ngata a mannurat ti makaammo iti galad wenno istruktura ti mini-sarita (a pinalatak ni Atty. Nole V. Lansangan, babaen ti pagiwarnakna a "Salinong" a regular a maaw-awat ti adu a mannurat nga Ilokano, nangruna dagiti agdadamo, a no sadino a dagiti sarita a maipabpablaak ket ababa, maysa wenno dua a panid laeng ngata, isu a "mini-sarita") ken ti ababa a nobela (ta adu metten ti impabpablaak ti Bannawag a nobelita).

Patiek nga adu a mannurat ti makasurat, wenno agsursurat pay ketdi, iti sarita a dida unay pampansinen ti kaadu ti panidna. Malaksid laeng no adda a pampanunoten ti limit iti kabassit wenno kaadu ti panid a kas koma no iti salip ket makedngan iti kas koma 10-15 wenno 10-25 wenno 10-30 a panid laeng a nakadoble espasio iti regular bond paper. Iti bukodko a padas, nakasuratakon iti sarita nga immabot iti 40 a panid. Ngem kapilitan nga ineditko, kinissayak ta insalipko ket 25 panid laeng met ti maximum a kaadu ti panid segun iti pagannurotan. Mayat met ketdi ta no editem ti atiddog unay a saritam, makayasam a nalaing, masedsed ti sarita. Ngem adda met dagiti gundaway nga uray an-anuem madi a mabalin a kissayam ngem ketdi kayatmo pay a nayonan koma. Iti Literatura nga Iluko, manmano a makasagang wenno makabasatayo iti sarita nga atiddog a kaslan nobela. No iti English wenno uray Tagalog ket adu. No apay, gapu siguro ta no agsurat ni mannurat nga Ilokano, adda iti isipna dagiti limitasion nga ikedkeddeng ti publikasion (nga uray atiddog ti manuskrito, karniento met la dagiti editor, putdan wenno kissayanda tapno mayan-anay iti limitado nga espasio ti magasin wenno pagiwarnak; nupay no dadduma ket adda met dagiti sarita a maituloytuloy (ar-aramiden ti Bannawag daytoy)) wenno ti pasalip.

Nasayaat met ngata no makaparnuaytayo kadagiti atitiddog a sarita. Wenno uray ababbaba (a kas kadagiti lalaonen ti "Salinong").

Isu a napanunotko nga iraman daytoy iti ATILA 2003-2004, nga inanamongan met ni Apo ATI.

Malagipko nga iti naudi a pasalip ti GRAAFIL iti sarita, agingga iti 30 panid ti sarita a maisalip. Makisalipak koma idi ngem ti naputarko iti nasurok la a 20 panid! Diak met ngarud mabalinen a nayonan pay iti 10 a panid ta talaga a nagpunton iti 20 panid.

Malagipko met nga iti panagpasalipmi idi iti GUMIL Nueva Vizcaya, adda nagpintas a sarita a disqualified ta nagsobra iti panid--nasurok sa 30 a panid daydiay. No saan koma a na-disqualify, isu koma ti Umuna a Gunggona, kas nakuna dagidi naghurado!

Itatta, iti ATILA 2003-2003, saanen nga isyu dagiti kastoy a kaso.

pagannurotan ti ATILA 2003-2004

2004-02-07T13:47:00.000+08:00

Salip iti Sarita 2003-2004

1. Silulukat ti pasalip iti amin a mannurat ngaIlokano, agdadamo ken saan, iti man Filipinas wenno iti uray ania a pagilian.

2. Nangrugi ti pasalip iti Nobiembre 1, 2003 ken aggibus iti Pebrero 15, 2004.

3. Ti sarita a suraten ket maipapan wenno agpaay kadagiti pannakabagi wenno ramay ti linteg wenno adda iti serbisio ti militaria/polisia/tanud (soldado, polis, wenno uray barangay tanud): ti prinsipio, pagrebbengan ken pannakigasanggasatda para iti urnos ken talna, hustisia, pagimbagan ti sapasap a gimong ken pagilian, ngem kangrunaanna kadagiti babassit wenno marigrigat ken maikuskuspil ken mapapaidaman nga umili. Masapul met nga iladawan ti sarita ti kultura a Filipino, nangruna ti kinaIlokano.

4. Saan a tradisional ti pannakasurat ti isalip a sarita, masapul a panay a dayalogo wenno panagpapatang (dialogues) ti pakabuklan ti sarita. No adda man wenno di maliklikan ti pasetna a narration, nasken a saan a nasursurok ngem 15 laeng a linia (sentence) a narration ti maaramat iti pakabuklan ti sarita.

5. Saan a makedngan ti kaababa wenno kaatiddog ti isalip a sarita, nawaya ti autor a mangeddeng no mano a panid ti manuskrito nga isumitena. Nupay kasta, nasken a kapkapnekan nga ababa a sarita ti isalip a saan ketdi a mini-sarita wenno ababa a nobela daytoy. Nasken met a naimakinilia ti isalip a sarita iti doble espasio iti 8-1/2” x11” a bond paper. Nasaysayaat pay no naikompiuter ti isalip iti font size a 12 ken fontface a Times New Roman wenno Arial. No naikompiuter ti isalip, pakuyogan ti kopiana iti diskette a naglaon iti file ti entry (iti MS Word document (.doc wenno .rtf) a format). Uppat a kopia ti manuskrito ti sarita ti mangbukel iti entry. Parbo a nagan ti usaren ti autor kas byline iti entryna. Pakuyogan ti entry iti nakarikep a sobre a naglaon iti paulo ti sarita, parbo ken pudno a nagan, kompleto/umno nga adres ti agdama a pagtaengan wenno pagobraan, email address ken cellphone/telephone number (no adda), maysa a 2”x2” a kaudian a ladawan, ken ababa a pakasaritaan ti biag.

6. Maysa laeng a sarita nga orihinal, bukod a putar,saan a patarus manipud aniaman a pagsasao, di pay naipablaak ken di pay nangabak iti aniaman a salip, ti mabalin nga isalip ti tunggal autor.

7. Agbalin a kukua ti esponsor dagiti mangabak a sarita ken addaan karbengan a mangedit ken mangipablaak kadagitoy iti libro, magasin, pagiwarnak, iti man printed wenno digital a format wenno iti Internet, nga awan sungsungbatanna iti autor.Agtalinaed ketdi ti copyright iti autor.

8. Pinal ti pangngeddeng dagiti hurado, saan a maibabawin ti naikeddeng a nangabak, malaksid no matakuatanto a sinalungasing ti nangabak nga autor ti Pagganurotan Bilang 6. No naglabsing ti autor, maibabawi ti premio ket maparitanto metten a makisalip pay kadagiti sumarsaruno pay a pasalip ti ATILA.

9. Paset ti pasalip ti panangsuratto dagiti agpaay a hurado iti bukodda a critical analysis wenno paliiw kadagiti amin a naisalip a sarita, nangabak man wenno naabak. Maisingasingto a maipablaak met dagitoy a paliiw wenno makuna ti/dagiti hurado iti magasin wenno libro a pakaipablaakan dagiti mangabak a sarita.

10. Dagiti premio: Umuna a Gunggona: $500.00 – ipaay ti JATOBI, Inc.; Maikadua a Gunggona: $350.00 – Mr. & Mrs. Lupo (San Diego) awards; Maikatlo a Gunggona: $250.00 – Atty. Shane Mallari (Chicago, Illinois) awards; Maikapat a Gunggona: $200.00 – Mr. & Mrs. Pol Atao (Houston, TX) awards; ken Maikalima a Gunggona: $150.00 – Mr. & Mrs. Bobby Fortenberry (Blessing, TX) awards. Maipaayan pay iti Plake ti Pammadayaw dagiti mangabak.

11. Mapadayawan dagiti mangabak kabayatan ti National Convention ti GUMIL Filipinas iti Kalgaw 2004. Dagiti mangabak a saan a makapan iti GF Convention, maibusonto wenno mapanto idanon ti esponsor ti premioda.

12. Ipatulod dagiti entry itoy nga adres: ATILA 2003-2004, c/o Daniel Nesperos, BANNAWAG, Liwayway Publishing, Inc. 2249 Chino Roces Avenue, Makati City, Philippines. Kadagiti adda accessna iti Internet, nasaysayaat no i-email ti entry iti kampilan001@myway.com wenno binagkal@myway.com (i-attach iti email ti file ti entry agraman nakasina a file ti ababa a pakasaritaan ti biag; pakuyogan met iti scanned a ladawan (no adda), i-attach met laeng daytoy iti email). Nasken a maawat amin nga entries iti di naladladaw ngem Pebrero 15, 2004.