<$BlogRSDURL$>

2/28/2004

listaan ti opisial nga entries iti atila 2003-2004 (update) 

17 amin ti final entries, saan a 16 kas damo a naiwaragawag. Maysa pay nga entry ti naawat ti Secretariat ket mairaman daytoy iti opisial nga entries a mapagpilian.

Dagiti ngarud sumaganad ti opisial nga entries iti Salip iti Sarita 2003-2004:

  1. BUYOT ni Napoleon Bonaperte

  2. SADIRI ni Lorimar Legrand

  3. TI PUSO KEN PANUNOT TI MAYSA NGA KABSAT NGA PULIS ni Charito Chavez

  4. BATON-LAGIP ni Bato Ni Lagip

  5. DAGITI DATON A SABONG ITI RIO DE LAOAG ni Julian Magdiwang

  6. DARA TI GERILIA ni Bonifacio T. Padsan

  7. PEON ni Ahedres Adik

  8. TI SUMINIT NGA DARANG NI APO INIT IDIAY SITIO REBBA ni Unknown

  9. AGARAGAAG LATTA DAGITI MARABANNUAR ni Anniniwan T. Agdama

  10. RONDA ni J. Diel Vim

  11. KARIT ni Baro a Kristo

  12. MARMARNA ni Bituen T. Amianan

  13. ABOUT… FACE! ni Sergeant Major

  14. DAGITI MALALAKI A TANOD ITI BARANGAY CAWCAWATI ni Kapitan Osmon

  15. G.I. JOE ni Salacnib Guerrero

  16. LADAWAN ni Sarhento Diego

  17. ARIMPADEK ni Eden Joana Paraiso

Padaanan ti umuna a ranking dagiti hurado iti sangapulo a kangatuan (top ten) kadagiti listaanda!

2/26/2004

pagannurotan ti maikadua a salip ti atila iti 2004-2005 

Adtoyen ti maysa pay a pasalip ti ATILA iti 2004-2005. Daytoy ti maikadua a salip, immuna ti Salip iti Puturistiko a Sarita. Kinapudno, naggiddan a naisingasing ken nainaw dagitoy a dua a salip ngem immuna a nasango ken naiwaragawag ti salip ti futuristic fiction kabayatan a maad-adal pay ti salip ti daniw. Madlawmi ngamin a nabayagen nga awan nagpasalip wenno agpaspasalip iti daniw. No dikam' agriro, kaudian ti salip ti dandaniw kagimongan nga inesponsoran ni Dr. Godofredo Reyes idi tawen 2000. Agingga ita. Ket ita a tawen, nirugian ni Apo Reynald Antonio iti RFAAFIL ti salip ti daniw. Pasarunuan met daytoy ti ATILA iti pananginanama nga agriing, aginat, agmurmuray, makarit dagiti adu a mannaniw nga agur-uray iti pakibalubalan ti pluma ken sirmatada.

(Update: Nagrirokami! Adda dagiti nagpaspasalip/agpaspasalip iti daniw manipud pay 2000. Mairaman ditoy ti Mannaniw ti Tawen ti COVLLA/Salinong ni Atty. Nole V. Lansangan ken ti tinawen nga Abuan-Valdez Awards for Iluko Literature (AVAIL) ni Apo Baldovino Ab. Valdez)

Adtoy ngaruden ti pagannurotan:

Art Tolentino Ignacio Literary Awards 2004-2005
Salip iti Daniw


Dagiti Pagannurotan:

  1. Silulukat ti salip iti amin a mannaniw nga Ilokano iti Filipinas ken iti uray ania a pagilian. Mangrugi ti salip iti Marso 1, 2004 ken aggibus iti Enero 31, 2005.


  2. Koleksion ti daniw, a buklen ti 12 wenno nasursurok pay, ngem saan a sumobra iti 15 a dandaniw, ti suraten kas entry. Silulukat ti tema ti putaren a daniw ngem maipangruna dagiti mangiladawan iti kultura ni Ilokano. Nawaya ti mannaniw iti estilo a kayatna a panangputar wenno panangsukog iti dandaniwna.


  3. Nasken a naimakinilia ti isalip a dandaniw iti doble espasio iti 8-1/2” x11” a bond paper. Nasaysayaat pay no naikompiuter ti isalip iti font size a 12 ken font face a Times, Times New Roman, Helvetica wenno Arial. Uppat a kopia ti manuskrito ti koleksion ti dandaniw ti mangbukel iti entry. Parbo a nagan ti usaren ti mannaniw kas byline iti entryna. No maikompiuter ti maisalip a manuskrito, mapakuyogan koma ti hard copy iti diskette a naglaon iti dua a MS Word document (.doc wenno .rtf) a kopia ti entry. No ikoreo ti manuskrito a maisalip, pakuyogan ti entry iti nakarikep a sobre a naglaon iti paulo ti koleksion ti daniw, parbo ken pudno a nagan, kompleto/umno nga adres ti agdama a pagtaengan wenno pagobraan, email address ken cellphone/telephone number (no adda), maysa a 2”x2” a kaudian a ladawan, ken ababa a pakasaritaan ti biag. No i-email ti entry, pakuyogan daytoy iti dua a MS Word document (.doc wenno .rtf) a naglaon iti paulo ti koleksion ti daniw, parbo ken pudno a nagan ti mannaniw, ken ababa a pakasaritaan ti biagna; pakuyogan met iti scanned a ladawan (no adda), i-attach met laeng daytoy iti email.


  4. Maysa laeng a koleksion ti daniw nga orihinal, bukod a putar, saan a patarus manipud iti aniaman a pagsasao, di pay naipablaak iti aniaman a publikasion a printed (libro, magasin, pagiwarnak, kdpy) wenno digital (e-book, CD-ROM, DVD-ROM, internet, kdpy) ken di pay nangabak iti aniaman a salip, ti mabalin nga isalip ti tunggal mannaniw.


  5. Agbalin a kukua ti esponsor dagiti mangabak a daniw ken addaan karbengan a mangedit ken mangipablaak kadagitoy iti libro, magasin, pagiwarnak, internet, iti man printed wenno digital a format, nga awan sungsungbatanna iti mannaniw. Nupay kasta, agtalinaed ketdi ti copyright iti mannaniw.


  6. Pinal ti pangngeddeng dagiti hurado, saan a maibabawi ti naikeddeng a nangabak, malaksid no matakuatanto a sinalungasing ti nangabak a mannaniw ti Pagannurotan Bilang 4. No naglabsing ti mannaniw, maibabawi ti premiona ken mapawilanton a makisalip pay kadagiti sumarsaruno pay a pasalip ti ATILA.


  7. Paset ti salip ti panangsuratto dagiti agpaay a hurado iti bukodda a critical analysis wenno paliiw kadagiti amin a naisalip a daniw. Maisingasingto a maipablaak met dagitoy a paliiw wenno makuna ti/dagiti hurado iti magasin wenno libro ken dadduma pay a medium a pakaipablaakan dagiti mangabak a daniw.


  8. Dagiti gunggona: Umuna a Gunggona: $350.00. Maikadua a Gunggona: $300.00. Maikatlo a Gunggona: $250.00. Maikapat a Gunggona: $200.00 ken Maikalima a Gunggona: $150.00 Maipaayan pay iti Plake ti Pammigbig dagiti mangabak.


  9. Mapadayawanto dagiti mangabak kabayatan ti National Convention ti GUMIL Filipinas iti Kalgaw 2005. Dagiti mangabak a saan a makapan iti GF Convention, maibusonto wenno mapanto idanon ti esponsor ti premioda.


  10. Ipatulod dagiti entry itoy nga adres: Salip ti Daniw, ATILA 2004-2005, c/o Daniel Nesperos, Liwayway Publishing, Inc., 2249 Chino Roces Avenue, 1231 Makati City, Philippines. Kadagiti adda accessna iti Internet, i-email ti entry iti ignac@myway.com, kampilan001@yahoo.com wenno artesobra@yahoo.com. Nasken a maipatulod amin nga entries iti di naladladaw ngem Enero 31, 2005.



2/25/2004

pasirip kadagiti naisalip 2 

Adtoy pay ti sumagmamano a parapo manipud kadagiti entry a sarita iti ATILA 2003-2004:

PASIRIP 3:

      …..Mayarig ti balaymo iti pagiliantayo, kabsat. Binasakbasak dagiti ganggannaet. Nasagradoan a lugar ti pagtaengan. Apay nga itulokmo a sakupen dagiti singkit? Kasta met ti Filipinas. Daytoy ti pagtaengantayo, kas Filipino. Sagrado daytoy a lugar. Ngem immay binasakbasak dagiti Hapones. Ania ti aramidem no umay basakbasaken ti maysa a sangsangaili ti balaymo, kabsat?

      Agpungtotak! Makapatayak la ketdi iti tao no kasta ti aramidenda iti balayko!

      No kasta ngarud, ammomon ti rumbeng nga aramidem manipud ita, kabsat. Basakbasaken ita dagiti Hapones ti Ilocos Norte a pagtaengam.

      A-ania ti aramidek?

      Paksiatem dagiti ganggannaet nga agbasakbasak ita iti pagtaengam, pari! Salaknibam ti dayaw ti pagtaengan a timmanoram. Paksiatem dagiti singkit iti Ilocos Norte!


PASIRIP 4:


….. Saan a kabusor ti soldado. Adun ti padasko iti dangadang. Gubat ti mangtenneb iti pudno a maingel. No nasaksiam dagiti inosente a biag a naibuis gapu iti gubat maawatam siguro ti riknak. Daytoy ita ti mangidurduron kaniak a mangispal a saan ket a pumatay. Tao met ti soldado, Magda. Ammomi met ti mangaasi ken makipagrikna. Maawatam kadi dayta?

—Wen, ngem iggemmo ti dossierko, saan kadi?

—Wen. Paset ti trabahok dayta.

—Ket, ania ti natakuatam? Am just curious!

—Kayatmo a talaga a maammuan? Okay, this is what I know... Magdalena Bintocan Salvador, 27 years old, Mags wenno Maggie ditoy Diliman a pangisursuruanna. Magda kadagiti dadakkel ken kasingedna iti probinsia. Ka Jima iti nakaikappenganna a grupo dagiti rebelde ken kaayan-ayat ni Ka Omar. Nagturpos iti Sociology iti Unibersidad ti Filipinas. Community organizer kadagiti kaiskuateran iti Diliman—Ups! Nasakit daydiay, Mag!

—Nasaksakit pay ti epekto ti pannakibiangmo! You ruined my life, Atty. Rivera. Now you are trying to undermine my self-respect!

—Sika ti mangperperdi iti biagmo! Ammom ti bagim. Ammom dagiti involvementmo. Ammom dagiti aktibidadmo. Ammom nga adu ti kalabanmo! Ngem natangken ti ulom!


2/24/2004

maysa pay salip iti atila 2004-2005 

Padaanan ti maysa pay a salip iti ATILA 2004-2005. Kagiddan nga inaw/singasing daytoy ti narugianen a Salip iti Puturistiko a Sarita ngem maad-adal pay ti mekaniksna sakbay a pormal a maiwaragawag ken opisial a maipaskil ti pagalagadanna.

Namnamaenmi nga adunto met laeng, wenno ad-adunto manen, ti makipartisipar iti daytoy a maysa pay a gannuat ti ATILA para kadagiti amin a mannurat nga Ilokano ken para iti Literatura a Samtoy, a kas iti adu met a nakipartisipar ken simmuporta ken sumupsuporta iti ATILA 2003-2004.

2/23/2004

listaan dagiti naisalip 

Dagiti sumaganad ti naawat nga entries iti Salip iti Sarita 2003-2004, kas impakaammo ti secretariat ti salip:

  1. BUYOT ni Napoleon Bonaperte

  2. SADIRI ni Lorimar Legrand

  3. TI PUSO KEN PANUNOT TI MAYSA NGA KABSAT NGA PULIS ni Charito Chavez

  4. BATON-LAGIP ni Bato Ni Lagip

  5. DAGITI DATON A SABONG ITI RIO DE LAOAG ni Julian Magdiwang

  6. DARA TI GERILIA ni Bonifacio T. Padsan

  7. PEON ni Ahedres Adik

  8. TI SUMINIT NGA DARANG NI APO INIT IDIAY SITIO REBBA ni Unknown

  9. AGARAGAAG LATTA DAGITI MARABANNUAR ni Anniniwan T. Agdama

  10. RONDA ni J. Diel Vim

  11. KARIT ni Baro a Kristo

  12. MARMARNA ni Bituen T. Amianan

  13. ABOUT… FACE! ni Sergeant Major

  14. DAGITI MALALAKI A TANOD ITI BARANGAY CAWCAWATI ni Kapitan Osmon

  15. G.I. JOE ni Salacnib Guerrero

  16. LADAWAN ni Sarhento Diego

Padaanan ti resulta ti salip!

2/20/2004

panangatur (manen) iti pagannurotan ti atila 2004-2005 

Tapno saanen a makatikaw (hopefully), ken sakbay nga ipaipablaakmi kadagiti magasin ken pagiwarnak, ken uray ta rugrugina pay met laeng, balbaliwanmi ti maysa a paset ti pagannurotan ti maikadua a salip ti ATILA para iti 2004-2005, Salip iti Puturistiko a Sarita.

Daytoy 'tay kuestionable nga annuroten, ti Pagannurotan Bilang 11, daydiay parte maipapan iti panagipatulod ken pannakaawat ti entries.

Daytoy ti agdama a Pagannurotan Bilang 11 (kas narebisar wennon naaatur):

Ipatulod dagiti entry itoy nga adres: ATILA 2004-2005, c/o Daniel Nesperos, Liwayway Publishing, Inc., 2249 Chino Roces Avenue, 1231 Makati City. Kadagiti adda accessna iti Internet, nasaysayaat no i-email ti entry iti kampilan001@myway.com, ignac@myway.com wenno binagkal@myway.com (i-attach iti email ti file ti entry agraman nakasina a file ti ababa a pakasaritaan ti biag; pakuyogan met iti scanned a ladawan (no adda), i-attach met laeng daytoy iti email). Nasken a maawat amin nga entries, a naipatulod wenno naikoreo wenno nai-email iti di naladladaw ngem Enero 31, 2005 (nasken a natimbrean ti sobre wenno pakete wenno email iti petsa sakbay wenno iti Enero 31, 2005).


Ket daytoy ti nabalbaliwan ken daytoyen ti pinal (hopefully, manen):

Ipatulod dagiti entry itoy nga adres: ATILA 2004-2005, c/o Daniel Nesperos, Liwayway Publishing, Inc., 2249 Chino Roces Avenue, 1231 Makati City. Kadagiti adda accessna iti Internet, nasaysayaat no i-email ti entry iti kampilan001@yahoo.com, wenno artesobra@yahoo.com (i-attach iti email ti file ti entry agraman nakasina a file ti ababa a pakasaritaan ti biag; pakuyogan met iti scanned a ladawan (no adda), i-attach met laeng daytoy iti email). Nasken a maipatulod amin nga entries iti di naladladaw ngem Enero 31, 2005 (nasken a natimbrean ti sobre wenno pakete wenno email iti petsa sakbay wenno iti Enero 31, 2005).



2/17/2004

biddut! 

Maysa a mannap-ay iti iluko.com ti nakadlaw iti maysa a biddut iti pagannurotan ti umuna a salip ti ATILA. Dimi man la nadlaw daytoyen! Dumawatkami iti dispensa iti amin a maseknan. Mea culpa!

Ti biddut? Ti pannakailanad ti pannakaawat dagiti entries mainaig iti deadline ti panagipatulod!

Iti Pagannurotan ti ATILA '03-'04, iti pagannurotan #12, kastoy ti nailanad: "Nasken a maawat amin nga entries iti di naladladaw ngem Pebrero 15, 2004." Biddut daytoy! Agparparang a Pebrero 15 ti deadline ti panagawat a di ket koma ti pannakaipatulod!

Ngarud, kastoy koma ti nailanad: "Nasken a maawat amin nga entries a naipatulod wenno naikoreo wenno nai-email iti di naladladaw ngem Pebrero 15, 2004" sa pay koma maikkan iti pannakailawlawagna a kastoy: "nasken a natimbrean ti sobre wenno pakete wenno email iti petsa sakbay wenno iti Pebrero 15, 2004" tapno saanen a makatikaw, ken tapno maiparis iti kuna iti pagannurotan #2 a "Nangrugi ti pasalip iti Nobiembre 1, 2003 ken aggibus iti Pebrero 15, 2004."

Daytoy a biddut, nairaman met laeng iti pagannurotan ti maikadua a salip (ATILA '04-'05) ta isu met la nga isu a document file, nabalbaliwan laeng ti sumagmamano a pasetna. Ngem itan binaliwanmin ti pagannurotan ti maikadua a salip tapno maatur ti biddut.

Manen, pagyamanan ti ATILA ni Apo Nakisalip iti pannakaduktal ken panangibagana iti daytoy a biddut.

baro a laon 

In-inut, ik-ikkantayo iti linaon dagiti blanko a links daytoy a blogsite. Madama a maar-aramid ti kaaduan. Addan laon ti dadduma.

Ita, am-ammuen dagiti sponsor ti ATILA '03-'04, ken ammuen metten ti kausa ken gagem ti ATILA.

2/16/2004

umuna a pasalip ti atila para 2004-2005 (revised) 

Adtoyen, appo a mannurat, gagayyem, naluktanen ti maikadua a pasalip ti ATILA. Nagsapan? mabalin a makunayo ta wen, met di pay nga agpayso nalnalpas (a napili wenno naawardan) ti ATILA 2003-2004 ket sapay nga adda manen baro a salip? Ngem di kadi nagsayaat, kakaisuna a nakagaggaget ken nakaregregget ti/dagiti sponsors ti ATILA, ket ita adtoy manen a maipasaruno ken maisapsapa ti maikadua a pasalip ti ATILA! Wen, tapno maaddaanen iti naan-anay a panawen ti amin a mannurat a mayat a makisalip, ita pay laeng rugiandan ti agputar iti pakibulangda a baud iti daytoy a derby iti Literatura Iluko (wen, kas madlaw, naikadadakkel pay dagiti premio a doliar, ama!) ket maikkanda iti adu a panawen a mangtaraken, mangpapigsa, mangpaandur, mangpaunget kadagiti ipallotda a sarita!

Adtoy ngaruden:

Art Tolentino Ignacio Literary Awards 2004-2005
Salip iti Puturistiko a Sarita


Dagiti Pagannurotan:

  1. Silulukat ti pasalip iti amin a mannurat nga Ilokano, agdadamo ken saan, iti man Filipinas wenno iti uray ania a pagilian.


  2. Nangrugi ti pasalip iti Enero 1, 2004 ken aggibus iti Enero 31, 2005.


  3. Ti sarita a suraten ket puturistiko, agwerret kadagiti tao, lugar ken pasamak iti masakbayan, iti sumaruno a 25 wenno 50 wenno 100 a tawen manipud iti agdama. Nasken a maipapan kadagiti Ilokano, mailugar ken mapasamak iti Filipinas kangrunaan iti Kailokuan, ti putaren a sarita. Saan a nasken a maipapan iti siensia wenno teknolohia ti tema wenno pakabuklan ti sarita, ketdi, maipangruna a matratar ti kultural, sosial, politikal-ideolohikal, ekonomikal wenno uray nainrelihionan a kasasaad ni Ilokano wenno ti Kailokuan iti masakbayan. Nupay kasta, no saan a maliklikan a mataked ti siensia wenno teknolohia mainaig kadagiti naagapad a kasasaad, saan koma nga agtinnag a bin-ig a science fiction ti sarita.


  4. Saan a makedngan ti kaababa wenno kaatiddog ti isalip a sarita, nawaya ti autor a mangeddeng no mano a panid ti manuskrito nga isumitena. Nasken met a naimakinilia ti isalip a sarita iti doble espasio iti 8-1/2” x11” a bond paper. Nasaysayaat pay no naikompiuter ti isalip iti font size a 12 ken fontface a Times New Roman wenno Arial. No naikompiuter ti isalip, pakuyogan ti kopiana iti diskette a naglaon iti file ti entry (iti MS Word document (.doc wenno .rtf) a format). Uppat a kopia ti manuskrito ti sarita ti mangbukel iti entry. Parbo a nagan ti usaren ti autor kas byline iti entryna. Pakuyogan ti entry iti nakarikep a sobre a naglaon iti paulo ti sarita, parbo ken pudno a nagan, kompleto/umno nga adres ti agdama a pagtaengan wenno pagobraan, email address ken cellphone/telephone number (no adda), maysa a 2”x2” a kaudian a ladawan, ken ababa a pakasaritaan ti biag.


  5. Maysa laeng a sarita nga orihinal, bukod a putar, saan a patarus manipud aniaman a pagsasao, di pay naipablaak iti aniaman a publikasion a printed (libro, magasin, pagiwarnak, kdpy) wenno digital (e-book, internet, kdpy) ken di pay nangabak iti aniaman a salip, ti mabalin nga isalip ti tunggal autor.


  6. Agbalin a kukua ti esponsor dagiti mangabak a sarita ken addaan karbengan a mangedit ken mangipablaak kadagitoy iti libro, magasin, pagiwarnak, internet, iti man printed wenno digital a format, nga awan sungsungbatanna iti autor. Agtalinaed ketdi ti copyright iti autor.


  7. Pinal ti pangngeddeng dagiti hurado, saan a maibabawin ti naikeddeng a nangabak, malaksid no matakuatanto a sinalungasing ti nangabak nga autor ti Pagannurotan Bilang 5. No naglabsing ti autor, maibabawi ti premio ket maparitanto metten a makisalip pay kadagiti sumarsaruno pay a pasalip ti ATILA.


  8. Paset ti pasalip ti panangsuratto dagiti agpaay a hurado iti bukodda a critical analysis wenno paliiw kadagiti amin a naisalip a sarita, nangabak man wenno naabak. Maisingasingto a maipablaak met dagitoy a paliiw wenno makuna ti/dagiti hurado iti magasin wenno libro a pakaipablaakan dagiti mangabak a sarita.


  9. Dagiti premio: Umuna a Gunggona: $550.00; Maikadua a Gunggona: $450.00; Maikatlo a Gunggona: $350.00; Maikapat a Gunggona: $250; ken Maikalima a Gunggona: $200.00. Maipaayan pay iti Plake ti Pammigbig dagiti mangabak.

  10. Mapadayawan dagiti mangabak kabayatan ti National Convention ti GUMIL Filipinas iti Kalgaw 2005. Dagiti mangabak a saan a makapan iti GF Convention, maibusonto wenno mapanto idanon ti esponsor ti premioda.


  11. Ipatulod dagiti entry itoy nga adres: ATILA 2004-2005, c/o Daniel Nesperos, Liwayway Publishing, Inc., 2249 Chino Roces Avenue, 1231 Makati City. Kadagiti adda accessna iti Internet, nasaysayaat no i-email ti entry iti kampilan001@myway.com, ignac@myway.com wenno binagkal@myway.com (i-attach iti email ti file ti entry agraman nakasina a file ti ababa a pakasaritaan ti biag; pakuyogan met iti scanned a ladawan (no adda), i-attach met laeng daytoy iti email). Nasken a maipatulod amin nga entries iti di naladladaw ngem Enero 31, 2005 (nasken a natimbrean ti sobre wenno pakete wenno email iti petsa sakbay wenno iti Enero 31, 2005).



pasirip kadagiti naisalip 1 

Agsangpet/nagsangpeten dagiti manuskrito ti entries iti ATILA '03-'04. Ket adtoy, ipasiripmi kadakayo ti sumagmamano a paset wenno parapo dagiti entry. Dimi ketdi ibaga ti paulo ken parbo a nagan ti autor dagiti manuskrito a nangalaanmi kadagitoy a parapo. Iwaragawagminto ditoy ti kompleto a listaan dagiti naawat nga entry.

PASIRIP 1:

"'...Apay nga adda gubat? Apay nga adu ti di agkikinnaawatan? Apay nga adu ti gamrud? Apay nga addakami ditoy, a makiramraman iti parikut ti sabali, ket agsagaba dagiti patpatgtenmi a napanawanmi, a di makaammo no makasublikami pay wenno ditoykami mettten a maigamay ti dara ken lasagna iti nakanganga a disierto a kas iti mabisin a buaya? Awan kadakami ti makaibaga iti sumaruno a mapasamak. Awan ti makaibaga a makaawidkaminto no bigat nga awan ti ania man a di nasayaat a mapagteng kadakami. Awan ti makaammo kadakami no agkikitakaminto pay kadagiti imbatimi a patpatgenmi. Awan ti makaibaga no kaano nga aggibus ti kastoy a gubat. No ut-utobek, madama ti gubat iti sangalubongan, ket agtultuloy ti panagsagaba dagiti mailupitlupit gapu iti kinagamrud dagiti buklis.'"

PASIRIP 2:

“Sir, ni Arcena… napuntaan. Ngem sibibiag pay laeng, ul-ulodenna ti ubing nga ip-ipan ditoy ‘yantayo. Iti panagkitak ket marigatan a makapan ditoyen, nangruna ket nakaron sa met ti panakapunta iti barukong ken iti tianna, numona ta adu ti nakasipot kenkuana. Ngem dina met ibbatan ti ubing.”

“Shit! Cover me! Cover me!”

“Sir, diyo sabten , delikado!”

BRATATAT! BRATATAT!

“Arcena, what are you doing? Apay nga insebbam ti biagmo iti daytoy nga ubing? Dimo kadi ammo a karaiwara dagiti nakasipot kadatayo? What have you done?”

“Napateg… ngamin ti ub-ubing kaniak, si-sir. Awan pay nga-ngamin ubingmi ken-kenni ba-baket. Sangapulo a-a ta-wenmin, ket mailiwak u-unayen i-iti u-u-bing, si-sir….”

“Arcena, hold on. Arcena… ARCENA!!!”


2/12/2004

topiko iti atila forum 

Maawiskayo a makipartisipar kadagiti forum ti ATILA. No adda kayatyo a topiko maipapan iti ATILA, wenno iti panagsuratan ken iti Literatura Iluko, mabalinyo ti manglukat sadiay (basta registered userskayon).

Napintas ti topiko maipapan iti/kadagiti pasalip iti Literatura Iluko. Naluktanen ti maipapan iti pasalip iti sarita nga insayangkat ti Bannawag magasin idi 1960s. Nailista sadiay ti titulo ken ranggo dagiti nangabak a sarita ken dagiti autorda iti tunggal tawen ti salip (1961-1972).

2/11/2004

panagyaman kadagiti mannarungkar 

Pagyamananmi unay dagiti kakabsat ken gagayyem a simmarungkar/sumarsarungkar iti ATILA website ken iti ATILA forum!

Kadagiti mayat a makipartisipar iti forum, nasaysayaat, appo, no agrehistrokayo tapno maaddaankayo sadiay iti naan-anay a user account tapno maaramatyo dagiti adu a feature ti forum ken nangnangruna, tapno maaksesyo dagiti forum ken threads nga agpaay laeng kadagiti forum members (saan a maakses no "guest" laeng).

Kadagiti met nagrehistron, mabalinyo ti sumrek iti forum ditoy.

2/10/2004

atila 2004-2005, sumaruno a salip: padaanan! 

Madaman a main-inaw ti sumaruno a pasalip ti ATILA para iti 2004-2005. Padaanan ti pannakaiwaragawag ken pannakaibinsabinsa daytoy a salip a manamnama (manen) a naidumduma kadagiti immun-unan a salip wenno napagsasalipan ken mainanama met a lalo a mangkarit ken ni mannurat nga Ilokano tapno ad-adda a mapagwerret wenno mapaguddogna pay ti imahinasion, sirmata, kinamanagparsuana--nangnangruna ti kinasidap ken kinasensitibona ken ti kinabisionariona iti nainkulturaan, nainpolitikaan/nain-ideolohiaan, nainsosialan, nain-ekonomiaan, wenno nainrelihionan a biag/panagbiag ni Ilokano.

Padaananyo, apo!

baro a dap-ayan ti atila 

Maragsakanak a mangipakaammo nga addan maysa pay nga online a dap-ayan ti ATILA! Barbareng no nasaysayaat ken naur-urnos daytoyen a pagsasarakan ken pagtutungtongantayo.

Padasenyo man ketdi, kakabsat, iklikyo laeng ti "Tungtongan" iti menu iti kanawan, wenno ti URL link iti ngato.





2/09/2004

interaksion iti atila blogsite 

Adda insambot 'toy numo, kas sigud a plano ken panangipangag payen iti dawat ti dadduma a kakabsat, a benneg ti interaksion 'toy web/blogsitetayo (kitaen ti menu iti kanawan). Adtoy, adda simple laeng (manen) a pagtutungtongan wenno dap-ayan a pagilanadantayo iti makuna wenno kapanunotan maipapan iti agdama a pasalip ti ATILA ken sumarsaruno pay a proyektona. Mabalin a temporario wenno interim pay laeng daytoy kabayatan a mabalbalabala ti nasaysayaat pay koma a pagdadanon a pagdadap-ayan (malaksid laeng kadagiti ATILA threads iti Dap-ayan ti iluko.com). Agsipud ta nai-host laeng iti libre ti nasao a pagtutungtongan, yan-anus ken pagpaspasensiaantay' latta koma pay laeng ta no kua ket adda tumpuar a popup windows ti advertisements ti host.

Mabalinyo met nga ilanad dagiti ababa a mensaheyo babaen ti sistema ti tag-board (iti babaen ti link "tungtungan").

sampol a sarita a bin-ig a panagpapatang 

(manipud ken ni ATI iti postena iti Dap-ayan 1 ti iluko.com)

Kas nadawat, adda indarasko a sampol ti panay dialogo a sarita. Anusanyon ta nakusel, ababa ket saan a kumpleto. Sampol la ngarud, aya? Mark this: Adda numero ti narrationna (di koma liplipatan a kinse (15) la a sentence ti mabalin a narration ti intero a sarita nga isalip). Ket maysa a TIP kadagiti agdadamo: ipan iti narrationna iti paggibusan ti kakastoy nga istoria, ngem tipden koma. Imbes nga inarrateyo, idayalogon dagiti karakter dagiti rimienta ti sarita.


DAGITI MINERO


HUY, GUAPITO DITA SULI, ‘nia ti naganmo?

Macliing. Sika ngay?

Doro. Doro ti awagda kaniak. Tagaanoka ken ‘nia ti rantam ditoy a sulsulinek?

Taga ditoyak, Bontoc!.Lepanto ti nagubraak idi. Ngem pimmanawak ta aramidendakami met la unayen a tagabo dagiti taga Patad idiay. Sika ania met ti rantam ditoy?

Siak ti ti immuna a nagdamag kenka, gyem. Ti balitok met ti rinantam?

Wen! Uray sika?

Ket wen a, nagdagmel ket ti di mangayat iti balitok!

‘Nia ti aramidem kadagiti rantaem a balitok?

Estupido dayta a damdamagem. ‘Nia met ti naganmo, sika?

Cario.

“Bal’tok met ti rantam?

Yah!

Naimutka iti balikas…. ‘Nia’t aramatem a pagkali?

Boom!

Makaringgor dayta a pamuspusam.

Madi ngata?

Hmmm…. Sika ngay dita, ‘nia ti naganmo?

Mail.

Balitok met ti rinantam ditoy?

Panagkunak datayo amin ket maymaysa ti rinantana ditoy.

(1) Kinita ni Doro dagiti adda iti masanguananna: Sika dita? Iti likudan ni Mail, ‘nia
ti naganmo?

Mariano.

Addaka ditoy ita gapu iti balitok, Mariano?

Ket wen a.

‘Nia met ti planom?

Planok latta a bukbukod,. Apay koma nga ibagakon…

Okey, Okey, dayta adda ‘ta likudam, nia ti naganna?

Damagem, a.

‘Nia’t naganmo?

Iddo.

Adda ammom Iddo a pamuspusan tapno makairugikan nga agala iti balitok ditoy?

Adda.

Ania?

Agaramid iti tunnel…

Adda rimientam?

Adda. Immayak ditoy idi lawasna ket tinestko ti bantay, natangken ti lasagna ngem kabaelantayo no agtitinnulongtayo.

Panagkunam, mayat ditoy a pangrugian ti abut? Laglagipenyo a dagiti inabutan dagidi immuna ngem datayo ket dida napatangan.

Papaayennak sa?

‘Pak koma nga aramidek dayta? ‘Nia met ti nagan dayta adda ‘ta likudam?

Magat! Sinno dagitoy a tattao ditoy?

Agbirirok iti balitok. Minero! ‘Nia’t makunam iti situasion ditoy, Magat?

Panagkunak, adutayo unay! Madi ti adu. Delikado! Daytoy met ti kaduak, a gayyemko. Ni Pedring.

P-Pedring, ti met balitok ti rantayo ditoy?

Hahahaha. Kas kaniayo. Agpapadatayto!

Maymayat ti adu ta no agtitinnulongtayo ket mabibiit ti trabaho, (2) adda nagkuna iti likudanda.

No agtitinnulong, mayat. Daytay awan ti sinnikap.

Wen, masapul ti timpuyog!

Boom!

Sinno daydiayen?

Ni Cario, dininamitanan ti bakrang ti bantay!

(3) Nagtatarayda a napan amin iti iking ti rangkis.

(4) Iti natippingan a bakras ti bantay, nagadu dagiti kasla bituen nga agrimatmat a kasla nailanang iti bakras ti bantay!

Addagitan dagitay bal…. Balitok! Balitok! Balitokkkkk!

Dikayo umarimbangaw, baka no adda makangngeg kadatayo!

Ket umayda makiagaw?

Tumaraytayo ketdi a mapan agtikapen… Kukuana maalana, sal-it! Balitokennnnnnn…

Koma a no makiagawda pay. Amangan no tagikuaendan amin!

Hahahahaha, ala irennekyo ti agala iti balitok!

Apay Doro, dika umay agala? Papanamon, Mail?

Innak ipan ti naalakon iti sang-at iti kuribotko. Napunnon ti kallugongko!

Bang! Bang! Bang!

Ne, ni Mail, pinaltogan ni Doro idiay sang-at sana inagaw ti kallugongna. Diablis a Doro!

Bratatattatttttattttaaattttt!!!! Siak ketdin ti utakanyo! Mas naut-utakak ngem dakayo amin!




2/07/2004

blog/website ti ATILA 

Kamaudiananna, addan damo a taeng ti ATILA iti Web!

Damo kunak man ta mabalin a temporario pay laeng daytoy kabayatan a matamtaming ti adu pay a teknikalidad tapno naan-anayton ti panagtaeng ti ATILA ditoy cyberspace. No pay no kua mabalin met ketdi ngatan a permanente a ditoy pay laeng wenno ditoynan.

Ket pamakpakawananyon, appo, ti kinanumo pay laeng ti sitio ti ATILA; ti kinagagangayna, ti kinasimplena. Pinilik ketdi met daytoy ta mas nasaysayaat met iti panagkunak ken panagramanko ('toy simplicity ken kina-minimalist ti layout/design, nga isut' maysa a trend iti web standards ita), kas natudingan a manarawidwid iti taeng ti ATILA iti web, ngem iti dadduma a pinadasko a sistema wenno teknolohia. Popular a teknolohia iti web daytoy blog wenno blogging (manipud iti termino a "web log"). Nabayag ketdi met daytoyen nga uso kadagiti netizens kas ramit wenno remienta para iti inaldaw-aldaw a biag iti online kas online journal wenno diary wenno kas maar-aramiden, kas online self-publication (vanity publishing, kunamon no isu). Ngem saan met laengen a writers wenno dagiti agduyos iti panagsurat wenno journalism wenno diarist wenno trippers iti kurkur-it wenno kinnur-it ta agarup isuaminen a hobbyist wenno netizens ket addaanen iti bukodna a blog.

Aya, ket, intay man met ita adaptaren dayta para iti ATILA. Tapnon nalaklaka ken nawaywayatay' la a maikurit wenno mailanad ti aniaman a madagdagus a mapanunot wenno maagapad maipapan iti ATILA.

Ket wen, pamakpakawananyo, ta adtoy saan pay a kompleto daytoy a site iti nasken a laonen wenno iparang/iwaragawagna. Ngem mapadaanan amin dagita ta madamada a main-inaw/maisagsagana a maidasar ditoy. Kangrunaan dagiti sumaruno a pakaammo, palawag, sungbat kadagiti nagkaadu a banag ken pakaseknan ti ATILA.

Kabayatanna, kadagiti amin nga interesado ken uray saan nga interesado a mannurat, ipatulodyon, appo, ti pakisalipyo--adda pay walo nga aldaw manipud ita (a petsa, 2/7) sakbay ti deadline.

Alla, ngarud!

annuroten ti ATILA: sumagmamano a panangilawlawag 

Kayatmi koma met ngamin a maiduma ti ATILA kadagiti dadduma a salip--dayta koma met makuna a naisalumina kadagiti tradisional wenno kombensional a langa, porma, wenno balabala wenno mekaniks ti pasalip/panagpasalip. Isu a malaksid iti porma ken kita ti suraten a sarita a kas pagayatan wenno kiddaw ti esponsor, ni ATI, ninayonak met iti dadduma a saan a maekspektar kadagiti dadduma nga annuroten ti existing a paspasalip kas ammo ken am-ammotayon (kas koma iti GRAAFIL, Palanca, etc.). Uray ti RFAAFIL, naiduma met ta isu la ngarud ti kaunaan a salip a maiwaragawag wenno maaramid pay ketdi a kangrunaan iti Web wenno Internet, ken adda pay kupikopna a Reader's Choice Awards. Maiduma unay. Naisalumina.

Kasta koma met ti kayatmi a mapasamak iti ATILA 2003-2004.

Ti maipapan iti kaatiddog ti isalip a sarita wenno ti kaadu ti panid ti sarita (Annuroten #5: Saan a makedngan ti kaababa wenno kaatiddog ti isalip a sarita, nawaya ti autor a mangeddeng no mano a panid ti manuskrito nga isumitena. Nupay kasta, nasken a kapkapnekan nga ababa a sarita ti isalip a saan ketdi a mini-sarita wenno ababa a nobela daytoy.), nalabit makatikaw, ngem maikkan ti mannurat iti wayawaya nga agsurat iti kapkapnekanna a kaatiddog (wenno kaababa) ti saritana. Adu met ngata a mannurat ti makaammo iti galad wenno istruktura ti mini-sarita (a pinalatak ni Atty. Nole V. Lansangan, babaen ti pagiwarnakna a "Salinong" a regular a maaw-awat ti adu a mannurat nga Ilokano, nangruna dagiti agdadamo, a no sadino a dagiti sarita a maipabpablaak ket ababa, maysa wenno dua a panid laeng ngata, isu a "mini-sarita") ken ti ababa a nobela (ta adu metten ti impabpablaak ti Bannawag a nobelita).

Patiek nga adu a mannurat ti makasurat, wenno agsursurat pay ketdi, iti sarita a dida unay pampansinen ti kaadu ti panidna. Malaksid laeng no adda a pampanunoten ti limit iti kabassit wenno kaadu ti panid a kas koma no iti salip ket makedngan iti kas koma 10-15 wenno 10-25 wenno 10-30 a panid laeng a nakadoble espasio iti regular bond paper. Iti bukodko a padas, nakasuratakon iti sarita nga immabot iti 40 a panid. Ngem kapilitan nga ineditko, kinissayak ta insalipko ket 25 panid laeng met ti maximum a kaadu ti panid segun iti pagannurotan. Mayat met ketdi ta no editem ti atiddog unay a saritam, makayasam a nalaing, masedsed ti sarita. Ngem adda met dagiti gundaway nga uray an-anuem madi a mabalin a kissayam ngem ketdi kayatmo pay a nayonan koma. Iti Literatura nga Iluko, manmano a makasagang wenno makabasatayo iti sarita nga atiddog a kaslan nobela. No iti English wenno uray Tagalog ket adu. No apay, gapu siguro ta no agsurat ni mannurat nga Ilokano, adda iti isipna dagiti limitasion nga ikedkeddeng ti publikasion (nga uray atiddog ti manuskrito, karniento met la dagiti editor, putdan wenno kissayanda tapno mayan-anay iti limitado nga espasio ti magasin wenno pagiwarnak; nupay no dadduma ket adda met dagiti sarita a maituloytuloy (ar-aramiden ti Bannawag daytoy)) wenno ti pasalip.

Nasayaat met ngata no makaparnuaytayo kadagiti atitiddog a sarita. Wenno uray ababbaba (a kas kadagiti lalaonen ti "Salinong").

Isu a napanunotko nga iraman daytoy iti ATILA 2003-2004, nga inanamongan met ni Apo ATI.

Malagipko nga iti naudi a pasalip ti GRAAFIL iti sarita, agingga iti 30 panid ti sarita a maisalip. Makisalipak koma idi ngem ti naputarko iti nasurok la a 20 panid! Diak met ngarud mabalinen a nayonan pay iti 10 a panid ta talaga a nagpunton iti 20 panid.

Malagipko met nga iti panagpasalipmi idi iti GUMIL Nueva Vizcaya, adda nagpintas a sarita a disqualified ta nagsobra iti panid--nasurok sa 30 a panid daydiay. No saan koma a na-disqualify, isu koma ti Umuna a Gunggona, kas nakuna dagidi naghurado!

Itatta, iti ATILA 2003-2003, saanen nga isyu dagiti kastoy a kaso.

pagannurotan ti ATILA 2003-2004 

Salip iti Sarita 2003-2004

1. Silulukat ti pasalip iti amin a mannurat ngaIlokano, agdadamo ken saan, iti man Filipinas wenno iti uray ania a pagilian.

2. Nangrugi ti pasalip iti Nobiembre 1, 2003 ken aggibus iti Pebrero 15, 2004.

3. Ti sarita a suraten ket maipapan wenno agpaay kadagiti pannakabagi wenno ramay ti linteg wenno adda iti serbisio ti militaria/polisia/tanud (soldado, polis, wenno uray barangay tanud): ti prinsipio, pagrebbengan ken pannakigasanggasatda para iti urnos ken talna, hustisia, pagimbagan ti sapasap a gimong ken pagilian, ngem kangrunaanna kadagiti babassit wenno marigrigat ken maikuskuspil ken mapapaidaman nga umili. Masapul met nga iladawan ti sarita ti kultura a Filipino, nangruna ti kinaIlokano.

4. Saan a tradisional ti pannakasurat ti isalip a sarita, masapul a panay a dayalogo wenno panagpapatang (dialogues) ti pakabuklan ti sarita. No adda man wenno di maliklikan ti pasetna a narration, nasken a saan a nasursurok ngem 15 laeng a linia (sentence) a narration ti maaramat iti pakabuklan ti sarita.

5. Saan a makedngan ti kaababa wenno kaatiddog ti isalip a sarita, nawaya ti autor a mangeddeng no mano a panid ti manuskrito nga isumitena. Nupay kasta, nasken a kapkapnekan nga ababa a sarita ti isalip a saan ketdi a mini-sarita wenno ababa a nobela daytoy. Nasken met a naimakinilia ti isalip a sarita iti doble espasio iti 8-1/2” x11” a bond paper. Nasaysayaat pay no naikompiuter ti isalip iti font size a 12 ken fontface a Times New Roman wenno Arial. No naikompiuter ti isalip, pakuyogan ti kopiana iti diskette a naglaon iti file ti entry (iti MS Word document (.doc wenno .rtf) a format). Uppat a kopia ti manuskrito ti sarita ti mangbukel iti entry. Parbo a nagan ti usaren ti autor kas byline iti entryna. Pakuyogan ti entry iti nakarikep a sobre a naglaon iti paulo ti sarita, parbo ken pudno a nagan, kompleto/umno nga adres ti agdama a pagtaengan wenno pagobraan, email address ken cellphone/telephone number (no adda), maysa a 2”x2” a kaudian a ladawan, ken ababa a pakasaritaan ti biag.

6. Maysa laeng a sarita nga orihinal, bukod a putar,saan a patarus manipud aniaman a pagsasao, di pay naipablaak ken di pay nangabak iti aniaman a salip, ti mabalin nga isalip ti tunggal autor.

7. Agbalin a kukua ti esponsor dagiti mangabak a sarita ken addaan karbengan a mangedit ken mangipablaak kadagitoy iti libro, magasin, pagiwarnak, iti man printed wenno digital a format wenno iti Internet, nga awan sungsungbatanna iti autor.Agtalinaed ketdi ti copyright iti autor.

8. Pinal ti pangngeddeng dagiti hurado, saan a maibabawin ti naikeddeng a nangabak, malaksid no matakuatanto a sinalungasing ti nangabak nga autor ti Pagganurotan Bilang 6. No naglabsing ti autor, maibabawi ti premio ket maparitanto metten a makisalip pay kadagiti sumarsaruno pay a pasalip ti ATILA.

9. Paset ti pasalip ti panangsuratto dagiti agpaay a hurado iti bukodda a critical analysis wenno paliiw kadagiti amin a naisalip a sarita, nangabak man wenno naabak. Maisingasingto a maipablaak met dagitoy a paliiw wenno makuna ti/dagiti hurado iti magasin wenno libro a pakaipablaakan dagiti mangabak a sarita.

10. Dagiti premio: Umuna a Gunggona: $500.00 – ipaay ti JATOBI, Inc.; Maikadua a Gunggona: $350.00 – Mr. & Mrs. Lupo (San Diego) awards; Maikatlo a Gunggona: $250.00 – Atty. Shane Mallari (Chicago, Illinois) awards; Maikapat a Gunggona: $200.00 – Mr. & Mrs. Pol Atao (Houston, TX) awards; ken Maikalima a Gunggona: $150.00 – Mr. & Mrs. Bobby Fortenberry (Blessing, TX) awards. Maipaayan pay iti Plake ti Pammadayaw dagiti mangabak.

11. Mapadayawan dagiti mangabak kabayatan ti National Convention ti GUMIL Filipinas iti Kalgaw 2004. Dagiti mangabak a saan a makapan iti GF Convention, maibusonto wenno mapanto idanon ti esponsor ti premioda.

12. Ipatulod dagiti entry itoy nga adres: ATILA 2003-2004, c/o Daniel Nesperos, BANNAWAG, Liwayway Publishing, Inc. 2249 Chino Roces Avenue, Makati City, Philippines. Kadagiti adda accessna iti Internet, nasaysayaat no i-email ti entry iti kampilan001@myway.com wenno binagkal@myway.com (i-attach iti email ti file ti entry agraman nakasina a file ti ababa a pakasaritaan ti biag; pakuyogan met iti scanned a ladawan (no adda), i-attach met laeng daytoy iti email). Nasken a maawat amin nga entries iti di naladladaw ngem Pebrero 15, 2004.


Creative Commons License
This work is licensed under a
Creative Commons License.

This page is powered by Blogger. Isn't yours?

Weblog Commenting and Trackback by HaloScan.com