<$BlogRSDURL$>

3/24/2004

kastan, mang itong... 

Nakalaladingit man a maammuan a maysa manen kadagiti kalaingan a mannurat nga Ilokano a kabsat, kadua ken gayyemtayo ti pimmusay. Kasinsina laeng ti maysa idi napalabas nga Aldaw dagiti Puso, ni daydi Apo William V. Alvarado ti Umingan, Pangasinan, simmaruno met a nangisurat iti 30 ti maysa kadagiti maibilang a teddek ti agdama a Literatura Iloko, maysa kadagiti kagagetan ken kasaetan ken kaaduan iti pammadayaw a naapit a pakairamanan ti Pedro Bucaneg Award, ni Apo Meliton Galinato Brillantes ti Aparri, Cagayan a pimmusay itay Marso 19.

Nakalaladingit, wen, nangruna kadakami ditoy ATILA, ta maysa kadagiti naayat a timmulong ni Mang Itong iti umuna a panagpasalipmi babaen ti panangipatulodna iti mabalin ket maysan kadagiti kauudian a putarna a sarita, ti "Dagiti Malalaki a Tanod iti Barangay Cawcawwati," a maysa met ngarud kadagiti napili a nangabak. Di bumurong a maysa daytoy a sarita kadagiti nagrigatan ni Mang Itong a sinurat maigapu iti panagsalogen ti pigsa wenno salun-atna, maibilang ngarud nga obramaestra nga insambotna, ket mapagasatan unay ti ATILA iti daytoy, ta iti maudi a ganggandat ken panangitultuloy latta ni Mang itong nga agsurat, adtoy nga adda pay maysa a putarna a naikamakamna ti maysa pay ken maudin a premio ken pammadayaw ken kas maysa pay a datonna nga obra para iti impatpategna a Literaturana.

Kas elehia ti ATILA, adtoy ti maysa a salaysay ni Apo Jimmy A. Agpalo, Jr., nga agpaay ken ni Mang Itong....


Dios ti Kumuyog, Ka Itong Brillantes
ni Jimmy M. Agpalo, Jr.

Uray pay no immunakan
Dinakam pinanawan
Sibibiagkanto latta
Iti Literatura Ilokana…

Ti panagngudot’ pluma
Ket saan a panagpakada,
Ngem iti panagngudot’ biagmo
Sigurado a kailiwdakanto…

Dios ti kumuyog, Ka Itong
Iti panaginanamon sabali a lubong…

Wen, kailiwdakanto, Ka Itong. Nabagas dagiti dawa nga inapitmi iti bangkagmo. Inapitmi kunak, ta dika nagpaidam a nangiburay kadakami iti rumbeng a taluntonenmi iti dana ti panagsuratan tapno makagtengkami met iti yuyeng dagiti bituen ti Literatura Ilokana…


TI GUMIL ABS (Aparri, Buguey, Sta. Teresita)

GUMIL Agtutubo, kunam pay idi a pangawag ti GUMIL ABS, para kadagiti agtutubo a mannurat a saan ket nga agdadamo a mannurat. Asideg ti pusok ti GUMIL ABS ta iti talonna nga immuna a nakaapitak iti kaunaan a balligi iti tay-ak ti salip ti sarita. (SARIDANDAN, 3rd Prize, General Eduardo Batalla Literary Awards).

Napintas daydi sirsirmataem a pagturongan ti GUMIL ABS: ti pannakaipasngay koma kadagiti baro a sulbod ti mannurat nga agtaud iti Aparri, Buguey ken Sta. Teresita. Saanka a napaay, Ka Itong, namsek dagiti apit ni Jovymar Tactac, ngem nakarkaro manen ken Ariel Tabag ta adda latta ti apitenna kadagiti tumapoganna a pasalip. Ni Abril? Wen, ni Abril Varilla, nupay indissonansan ti plumana, saan ket a nanglipat, ta adda latta met a makiar-arukattit kadagiti mannurat iti internet.


TI IMMULAM ITI PANUNOTMI TI REGGET

Inellekanmi idi iti insurom a regget tapno agbalinkami a naan-anay a mannurat. Wen, saanka a nagbiddut: no awan ti regget nga agsurat, saan a makagteng iti gungun-oden a tapaw ti balligi.

Wen, no dumteng ti upay iti panagsurat, (ta maupay met ti maysa a mannurat) lagipek laeng ti ti kinareggetyo a dua nga agsurat ken ni Kayong Diony (Dionisio S. Bulong), ta imoskiteruanyo a dua iti inkay panangtugtugkel ti makinilia.

Diak la ammon ita, kadagiti agtutubo a mannurat no maaramidda dayta a kinaregget nga agsurat: a saan a lapped dagiti lamok ken ti kuridemdem a saingan. Daytoy a kinareggetyo a dua, ti immulam kadakami. Kinaregget ti dua nga agbarkada.

Kinaregget. Wen, isu met laeng daytoy manen, ti immula ni manong Reynaldo A. Duque iti panunotko. Daytoy a kinaregget no apay a dagiti BIG FOUR iti Literatura Ilokana ti kararaniagan iti bituen. Uppat nga agbabarkada idi agtutuboda, Reynaldo A. Duque, Frank Quitazol, Lorenzo Tabin ken Leonardo Belen. Wen, saan a gapu dayta “Sangaribu ket Maysa Tawa ti Langit” iti diding ti boarding houseda, no di ket iti nalaus a panagayatda iti literatura ti darada.

Kinaregget, wen, kinaregget! Immula met ni Pedrito Sanidad iti panunotko. Ti kinareggetda nga agkakasinsin: Pedrito Sanidad, Eldorado Licos ken Alfredo Mabalot, ta bay-an pay la ti agtudok iti tabako no katabok ti panagsurat iti sarita ken daniw.

Ngem sika, Ka Itong, ti kaunaan a nangimula iti panunot Iti kinaregget.


DAGITI TUGOTMO

Taldiapanta man dagiti tugotmo iti literatura. Ay, nalabonda! Adda ti Bannawag Annual Short Story Writing Contes, GRAAFIL, ETTI, GETSMAIL ken ti ATILA.

Adu dagitoy a sinuratmo, ngem manggaw-isak laeng iti sumagmamano a saritam: Saankonto a malipatan ti “Bulong iti Sab-ok ti Angin,” ta ngamin, “Saan a Marukod ti Dara” iti “Bukel ti Agsapa.” “Ta Kasano Koma a Dakamaten” ti “Angkla” ken ti “Ti Atang, ti Temtem ken ti Sangapuon a Mangga” ti kinaaddan, wen, kinaadda ti “Ti Kalintegan ti Suelas ti Sapatos.” Eleksion manen, Ka Itong, maaguantaran ngata a maaywanan “Dagiti Malalaki a Tanud iti Brgy. Cawcawati” “Ti Eleksion iti Barangaymi?”

Kadagiti nobelam: Saan ngata a ni “Kir-is” wenno ni “Arlong Buaya” ti “Ti Nangisit a Didiosen iti Bantay Quigao(?)” Ti “Ti Apuy iti Kabambantayan" ket isu da “Biuag ken Malan-a: Dagiti Malalaki iti Cagayan” ken da “Alla ken Cappan.” Wen, hustoka la unay, Ka Itong, “Saan a Pamulinawen Amin a Bato” “No Agbukar ti Busel, “ “Kabagis,” ngamin, “Nabanglo Pay ni Mayyang” isu a kunaem latta nga ipukkaw: “Batognan, Asawanan!”

(Dagiti naka-ITALICS isuda ti paulo dagiti sinuratmo.)



DAKKEL A PUSO

Kuna ni Ading Ariel (Tabag) iti emailna, dimmakkel kano dayta pusom, nga isu ti rason no apay a pimmussiawka ken ken nangpasalog ti pigsam.

Makaluaak la unay, ta sangapulon a tawen ti napalabas, dayta met ti nakita dagiti gagayyem a doktor a sagsagabaek iti laksid dayta nay traydor a hayblad.

Kastansa, ngamin “dakkel unay ti panagpuspuso dagiti mannurat,” saan kadi? Dakkel ti panagpuspusoda iti Literatura Ilokana.


DIOS TI KUMUYOG…

Dios ti Kumuyog, Ka Itong. Idi Enero, innalan ni APO ti maysa met a malalaki a mannurat iti Literatura Ilokana, ni Tang Tony (Antonio S. Encarnacion). Idi Pebrero, simmaruno ni Ka William V. Alvarado. Sa ita a bulan ti Marso, sika met ti akimbatang, Ka Itong.

Ala, wen, ala, immunakayon. Ta adda ti umun-una, adda ti maud-udi. Sumarunokaminto met, ta alangan met nga agbantaykami ditoy lubong, he-he-he! (Agpakatawaak latta, uray no agluluak a mangsursurat kadaytoy.)

Dios ti kumuyog, Ka Itong…..

Comments: Post a Comment

Creative Commons License
This work is licensed under a
Creative Commons License.

This page is powered by Blogger. Isn't yours?

Weblog Commenting and Trackback by HaloScan.com